Krimet e Rënda nisën hetimet për shtetasin kroat Sadat Toskic i dyshuar si rrëmbyes i katër fëmijëve, mes tyre edhe Bleona Mata.
Nëna e Bleona Matës deklaroi në studion e Report Tv se ka parë në fshat kroatin e dyshuar, në ditën e rrëmbimit të saj. E përlotur në studio tha se i vjen keq që nuk është pranë vajzës së saj në moshën më të rëndësishme.
“Kroacia ka lidhje shumë të fortë me fshatin tonë. Ky person është parë dy tre herë atje. Ai ka pasur rrugëdalje në fshat. E kam parë me sytë e mi. E kam parë në një dasmë por edhe ditën që ka humbur vajza. Dikush na ka thënë se ka qenë një person me kapucc në kokë. Një pjesë e mirë e bashkëfshatarëve të mi jetojnë në Kroaci dhe kjo të bën të dyshosh. Vajza ime është vetëm, po vuan dënim pa bërë krim. Ajo po vuan atë dënim, por nuk bën dot as një telefonatë”, u shpreh nëna e Bleona Matës.
Gjyshi i Bleona Matës tregoi përmes një lidhjeje telefonike se prej vitesh nuk flet me të birin, babain e Bleonës i cili e ka fajësuar që nuk i ka treguar menjëherë lajmin për humbjen e vajzë.
Ai tha se kushdo mund të jetë rrëmbyesi i vajzës së saj, pasi pas kaq shumë vitesh nuk ka më besim as te këmisha e tij.
