Legjenda e përjetshme e futbollit, Diego Armando Maradona, ndërroi jetë ditën e djeshme si pasojë e një ataku kardiak. Para disa ditësh ai kishte kryer një operacion të ndërlikuar, pas një goditjeje të rëndë në tru dhe gjendja e tij ishte e stabilizuar, aq sa mjekët kishin dhënë lejen për të vazhduar kurën në një shtëpi pranë dy vajzave të tij. Por jo gjithçka shkoi mirë, sepse sipas raportimit të Clarin në Argjentinë, legjenda e futbollit botëror pësoi një arrest kardiak në shtëpinë e tij, në San Andres, në qytetin e Tigre.
Ndërkohë avokati i Maradonas, Matias Morla, ka kërkuar hetim për vdekjen e ish-futbollistit. Ai ka treguar se për 12 orë nuk ka pasur fare vëmendjen e personelit mjekësor. Vdekjen e Maradona-s ai e ka cilësuar një krim idiot dhe të pashpjegueshëm.
“Sot është një ditë e vuajtjes së madhe, pikëllimit dhe reflektimit”, ka thënë Morla në një komunikatë zyrtare që transmetohet nga Calciomercato.com. E ndiej në zemër humbjen e një miku, të cilin e kam respektuar me besnikëri deri në ditën e fundit. E kam përshëndetur personalisht, funerali duhet të jetë një moment privat dhe familjar.
Në bazë të asaj që ka thënë prokurori i San Isidro, është e pashpjegueshme që për 12 orë, Diego nuk ka pasur vëmendje ose kontroll nga personeli mjekësor. Ambulancës iu desh më shumë se gjysmë ore për të arritur, ishte një krim idiot. Ky fakt nuk duhet të kalojë pa u vërejtur dhe ju kërkoj që ta hetoni deri në fund.
Siç më ka thënë Diego: ‘Ti je ushtari im, i cili punon pa mëshirë’”, është shprehur avokati i ish-legjendës së futbollit.
