Një ngjarje e rëndë ka tronditur Tiranën, ku një 37-vjeçare mësohet se është vrarë me thikë nga e motra.
Ngjarja ka ndodhur mesditën e së shtunës (2 shtator) në rrugën “Hajdar Hidri” në kryeqytet.
Familjarët e viktimës, Amanda Pushanit, sipas uniformave blu, e kanë raportuar vdekjen e saj si natyrale, por pas kryerjes së autopsisë ka rezultuar se 37 vjeçarja ka ndërruar jetë si pasojë e plagëve të marra nga një thikë.
Pas hetimeve u zbulua se autore e dyshuar ishte e motra, Marsela Pushani. 40-vjeçarja është vendosur në prangat e policisë dhe akuzohet për veprën penale “Vrasja për shkak të marrëdhënieve familjare”.
Policia ka shoqëruar të afërm të viktimës për t’i marrë në pyetje dhe paraprakisht dyshohet se krimi ka ndodhur pas një sherri mes tyre.
Në dëshminë e saj autorja e dyshuar, Marsela Pushani ka treguar se në momentin kur ndodhi krimi, viktima Amanda Pushani e kishte kërcënuar me jetë atë dhe nënën e saj, duke theksuar se veproi në kushtet e vetë mbrojtjes.
“Veprova në kushtet e vetëmbrojtjes, na kërcënoi se do na vriste. Prej më shumë se 10 vitesh motra Amanda Pushani ishte e alkoolizuar dhe problematike. Debatuam me të që të linte alkoolin, Amanda më kërcënoi mua dhe mamanë”-tha ajo.
