Kosova dhe Shqipëria hedhin hapin e parë serioz të bashkëpunimit në sport, duke krijuar ligën e përbashkët të basketbollit.
E ashtuquajtura “Liga Unike” është një kampionat ku do të marrin pjesë 4 skuadrat më të mira të basketbollit në Kosovë dhe 4 më të mirat e këtij sporti në Shqipëri, për të garuar me njëra-tjetrën.
Synimi i kësaj lige, që do të startojë brenda vjeshtës, është që të zgjojë interesin e këtij sporti, duke qenë se është një format mjaft interesant, që parashikon ndeshje si në Kosovë ashtu edhe në Shqipëri, por mbi të gjitha edhe një rivalitet më të madh.
Nesër, e enjte 10 shtator 2020, në orën 19:00 në Tiranë do të nënshkruhet marrëveshja nga presidenti i Federatës Shqiptare të Basketbollit Avni Ponari dhe ai i Federatës Kosovare të Basketbollit, Arben Fetahu.
Në prani të tyre do të jenë edhe Ministrja e Arsimit, Rinisë dhe Sportit në Shqipëri, Besa Shahini e Ministrja e Kulturës, Rinisë dhe Sportit në Kosovë, Vlora Dumoshi, ndërsa në ceremoni do të marrë pjesë edhe kryeministri Edi Rama, i cili do të zbulojë edhe logon e Ligës Unike.
Njoftimi i Federatës së Basketbollit të Kosovës
Të enjten, më 10 shtator, ora 19:00 në Tiranë do të nënshkruhet marrëveshja historike ndërmjet Federatës Shqiptare të Basketbollit (FSHB) dhe Federatës së Basketbollit të Kosovës (FBK) për themelimin e Ligës së basketbollit, mes dy shteteve, që do të quhet “Liga UNIKE”.
Marrëveshjen do ta nënshkruajnë, Presidenti i FSHB-së, Z. Avni Ponari, kryetari i FBK-së, Z. Arben Fetahu, në praninë e Znj. Besa Shahini, Ministre e Arsimit, Sportit dhe Rinisë në Shqipëri dhe Znj. Vlora Dumoshi, Ministre për Kulturë, Rini dhe Sport e Kosovës.
I pranishëm në këtë ceremoni do të jetë edhe Kryeministri i Republikës së Shqipërisë, Z.Edi Rama, i cili njëherësh do të zbulojë edhe logon e Ligës UNIKE.
Pas një pune të gjatë dhe intensive mes dy federatave, më në fund po jetësohet ëndrra për zhvillimin e veprimtarive basketbollistike të trevave shqiptare.
Në Ligën Unike do të marrin pjesë tetë skuadra, katër më të mirat nga Kosova dhe katër më të mirat nga Shqipëria.
Liga Unike pritet të fillojë së shpejti, gjatë këtij edicioni sportiv, dhe parashikohet të jetë shumë interesante, duke zgjuar interesimin e tifozëve shqiptarë, kurse në parket pritet të ketë shumë rivalitet mes skuadrave që do të përfshihen në këtë kompeticion.
Po ashtu të enjten Bordi Drejtues i Ligës UNIKE që përbëhet nga 2 anëtarë të Bordeve të FSHB-së dhe FBK-së, si dhe nga 2 Sekretarët e Përgjithshëm të të dyja Federatave, do të mbajë mbledhjen e parë, ku do të emërojë edhe Kryetarin e Bordit Drejtues, e do të emërojnë stafin e zyrës së Ligës UNIKE.
Duhet theksuar se ky është një hap i madh për basketbollin në hapësirat shqiptare duke formuar ligën UNIKE.
Ky projekt është përkrahur nga komuniteti i basktebollit në Shqipëri dhe Kosovë, duke e konsideruar atë si një event të shumëpritur dhe gjithashtu është përkrahur edhe nga FIBA Evropa.
