Peshëngritësi shqiptar Briken Calja përfundoi sot rrugëtimin e tij në lojërat olimpike “Tokyo 2020” duke u renditur në vendin e katërt në kategorinë deri në 73 kilogramë në peshëngritje. Ai ngriti gjithsej 341 kilogramë dhe vetëm për një kilogramë mbeti pa medalje. Por pavarësisht se si shkoi gara, rezultati final ishte më i miri i arritur deri më sot një nga një sportist shqiptar.
Pas përfundimit të garës, Calja u shpreh shumë i kënaqur që shënoi rezultatin më të mirë në historinë e sportit shqiptar.
“Me rezultatin jam jashtëzakonisht i kënaqur. Mos të harrojmë se në shtytje dola i treti, një rezultat fantastik. Rezultati më i mirë i sportit shqiptar në histori shqiptare. Mos të harrojmë se unë kam zënë vendin e gjashtë në Londër, të pestin në Rio. Isha vetëm një vend larg medaljes, por ky është sporti. Është rezultat historik. Dua të falënderoj familjen time jashtëzakonisht shumë, për shkak se kemi kaluar një situatë jo të mirë. Falënderoj Zotin që ka dal mirë gjithçka. Duhet të jemi të lumtur për rezultatin, është rezultat historik dhe jam shumë i lumtur”, tha Calja për KTV-në.
Pas përfundimit të garës, Calja mori edhe mbështetjen e krerëve të shtetit.
“Edhe pse pa medalje për vetëm 1kg diferencë, Brikeni meriton një bravo të madhe për renditjen në vendin e katërt në Lojrat Olimpike të Tokios”, shkroi kryeministri Edi Rama në një postim në “Facebook”.
Po ashtu Presidenti Ilir Meta e cilësoi paraqitjen e Caljas si të shkëlqyer dhe një arritje dinjitoze për vendin tonë.
“Në vendin e katërt në botë, vetëm për 1 kg larg medaljes olimpike. Përfaqësim i shkëlqyer i Briken Caljas dhe një arritje dinjitoze për Shqipërinë!”, shkruan Meta.
Kujtojmë se Briken Calja është ngjitur në podiume si kampion europe dhe medalist botëror. Ndër arritjet e tij më të fundit mund të përmendim Medaljen e Argjendit në shtytje dhe të Bronzit në dygarësh, të cilat i fitoi në Kampionatin Europian të Peshëngritjes që u mbajt në muajin prill në Moskë.
