Mbi 1,500 mësues në gjithë territorin e Kosovës do të testohen për koronavirus, para se të fillojë procesi mësimor më 14 shtator.
Lajmin e ka dhënë ministri i Arsimit dhe Shkencës në qeverinë e Kosovës, Ramë Likaj, i cili është shprehur se testimi i arsimtarëve do të kryhet për të parë situatën e infeksionit dhe gjendjen me të cilën do të nisë viti i ri shkollor. Aktualisht testimi i mësuesve ka nisur dhe po bëhet rastësor.
“Ne kemi marrë informata që do testohen 1,500 arsimtarë në nivel të Kosovës, që i bie mbi 6.5 për qind të numrit të përgjithshëm të arsimtarëve, në mënyrë që të dimë situatën e infeksionit ose me cilën gjendje po hyjmë në vitin e ri shkollor. Testimi ka filluar. Edhe nga Komuna e Shtimes, arsimtarët e përzgjedhur në mënyrë të rastësishëm, kanë shkuar të testohen në qytetin Ferizajt”, tha ministri Lika.
Viti i ri shkollor në Kosovë duhej të fillonte më 1 shtator, por është shtyrë, me qëllim të sigurimit të kushteve të sigurta për fëmijët, mësimdhënësit dhe prindërit. Ndërkohë në Shqipëri, kostoja e rritjes së infektimeve është vlerësuar si më e ulët, sesa ajo psikologjike që mund të shkaktonte mbajtja mbyllur e shkollave edhe për një farë kohe.
E ndërkohë që Kosova ka marrë masa konkrete për të parandaluar përhapjen e virusit, në Shqipëri, nxënësit, mësuesit dhe stafi i shkollës po lihen në mëshirë të fatit. Në një takim me nxënësit në Durrës, kreu i qeverisë Edi Rama tha se masat për vitin e ri shkollor janë marrë, por shtoi se e gjitha varet nga njerëzit.
“Mjafton njëri të gabojë për të marrë në qafë të tjerët”, tha Rama.
Rama pranoi se me hapjen e shkollave numrat do rriten, por theksoi që rëndësi ka që shifrat të jenë të përmbajtshme. Gjithashtu ai theksoi se është parashikuar mbyllja e shkollave që do të kthehen në vatra infeksioni, por a nuk do të ishte më mirë ta paraprinim rritjen e këtyre shifrave të infektimeve?
“Një shkollë e tërë mund të mbyllet nëse kthehet në një vatër…Besoj se është bërë një punë shumë e mirë nga ana e mësuesve që kanali i shkollës të jetë një burim shumë i mirë informacioni. Duhet të bëni kujdes jashtë shkollës. Duhen refuzuar opinionet që ky është një grip i rëndomtë, që është një sajesë..Faktkisht çdo ditë njerëzit po ndahen nga jeta. Fatmirësisht numri i fataliteteve nuk është në tërësinë e vet, më i madh në mënyrë të ndjeshme, saç ka qenë vitin e shkuar…”, u shpreh kreu i qeverisë.
E ndonëse nuk kanë filluar ende shkollat, dje një mësuese dhe një sanitare e shkollës 9-vjeçare “Naim Frashëri” në Fier, kanë rezultuar pozitive me koronavirus.
Nuk dihet ende nëse ditët e fundit mësuesja ka pasur kontakt me nxënësit e saj, duke qenë se mësimi për nxënësit që nuk kanë marrë dot njohuri gjatë periudhës së karantinës, ka nisur prej fillimit të muajit shtator.
Parashikimet e ekspertëve flasin për një valë të dytë të virusit që do jetë më e fortë se e para, ndërkohë që Shqipëria nuk i ka kushtet as për të pajisur me maska nxënësit siç po bëjnë fqinjët, Italia apo Greqia.
Për më tepër që sistemi shëndetësor shqiptar nuk ofron as kushtet më minimale të medikamenteve, apo atë të pajisjeve si aparaturat e kujdesit intensiv, aq të vlefshme për të shpëtuar jetët e pacientëve të intubuar.
Kur ende pa filluar shkolla kemi staf të infektuar në këto institucione arsimore, çfarë pritet të ndodhë në muajit në vijim dhe si do e përballojmë këtë krizë shëndetësore?
/Iconstyle.al
