Mbrëmjen e djeshme një vatër e madhe zjarri u përhap mbi gjithë sipërfaqen e tunelit të Kalimashit në Kukës. Si pasojë e erës flakët e zjarrit u përhapën me shpejtësi duke krijuar një situatë mjaft të rrezikshme.
View this post on Instagram
Duke parë situatën e vështirë, menjëherë mbërritën nga Kosova zjarrfikëse dhe forca nga FSK-ja (Forca e Sigurisë së Kosovës), që ndihmuan në shuarjen e flakëve mbi tunelin e Kalimashit. Gjatë natës të gjitha forcat zjarrfikëse si nga Shqipëria dhe Kosova punuan për normalizimin e situatës së zjarrit.
Mëngjesin e sotëm situata paraqitej shumë herë më e qetë dhe zjarri në faqen e malit mbi tunel u shua. Mirëpo tashmë situata paraqitet kritike në dy vatra zjarri, tek “Laku i Thive” dhe “Qafa e Kumbullës”, në Malin e Rrunës.
Mësohet se në këto dy vatra janë forcat e Emergjencave Civile, shërbimi zjarrfikës Kukës, trupat e ushtrisë së Kosovës dhe zjarrfikësit e Kosovës. Situata paraqitet kritike deri në këto momente dhe në rrezik janë pesë banesa me rreth 30 banorë të lagjes Lepraj.
Në fshatin Shën Mëri, aktualisht nuk ka rrezik për banesat, por për çdo rast raportohet se janë marrë masat nga ana e bashkisë Kukës për evakuimin dhe akomodimin e banorëve në shkollën e fshatit.
Ndërsa, sa i përket situatës në Kalimash, mbi tunel është shuar pjesa nga ana e Kukësit ndërsa sipas Komisionit të Mbrojtjes Civile, situata është kritike nga ana e Fanit në Thirrë.
