Bizeneset e vogla, sidomos baret dhe restorantet, i kanë vuajtur më së shumti pasojat e pandemisë. Ata ishin të parët që u mbyllën në valën e parë të pandemisë, por edhe pas rihapjes së tyre nuk mundën ta rikthenin punën njësoj siç ishte më parë. Reduktimi i orarit të lëvizjes pati një ndikim shumë të madh në gjithë punën e tyre, sidomos para disa muajsh kur qeveria vendosi që ora policore të niste që në orën 20:30.
Përveçse ndikoi në thellimin e krizës ekonomike të këtyre bizneseve, shteti shqiptar nuk dha e nuk vazhdon të japë asnjë lloj ndihme për t’ju lehtësuar sadopak vështirësitë e tyre financiare.
Kosova hapa konkret për rimëkëmbjen ekonomike, qeveria shqiptare hesht!
Ditën e sotme kryeministri në detyrë i Kosovës, Avdullah Hoti, shpalosi programin për rimëkëmbje ekonomike për vitin 2021. Mes kategorive të ndryshme që do të përfitojnë nga ndihma e shtetit, ishte dhe sektori i gastronomisë. Hoti tha se për këtë sektor do të shpërndahen 3 milionë euro, për t’i ndihmuar që të rimëkëmben pas kësaj krize, që në fakt ka përfshirë gjithë botën.
“11 milionë euro për shtesa në pagë për ata që bartin barrën kryesore në menaxhimin e pandemisë. Për Ministrinë e Bujqësisë kemi ndarë 12 milionë euro. Ministrinë e Tregtisë kemi ndarë 9 milionë euro, 3 milionë për sektorin e gastronomisë”, u shpreh Hoti.
Ndërkohë qeveria shqiptare vazhdon të heshtë, pavarësisht se shoqata e bareve dhe restoranteve ka kërkuar shpeshherë ndihmë gjatë këtyre muajve. Shteti ynë është mjaftuar vetëm me pagat e luftës, që u dhanë në muajin prill dhe nuk ka bërë më asnjë lëvizje tjetër për të ndihmuar këtë sektor.
Kryetari i shoqatës së bareve, restoranteve dhe clubeve, Enri Jahaj, u shpreh muajin e shkuar se xhiroja e këtyre bizneseve është reduktuar me 50% dhe se sigurisht është ulur akoma dhe më shumë pas ndryshimeve të orës policore. Kufizimet në orare përveçse ndikuan në thellimin e krizës, nuk bënë asgjë tjetër më shumë, sepse ndryshimi me një orë e gjysmë nuk bëri asnjë lloj diference në situatën me Covid-19.
Shumica e bizneseve penalizohen nga konkurrenca e pandershme
Një pjesë e madhe e restoranteve dhe bareve janë penalizuar edhe nga konkurrenca e pandershme këto kohë. Për disa prej tyre rregullat e vendosura nga qeveria nuk kanë funksionuar, duke përdorur mënyra nga më të ndryshmet për të mbajtur hapur objektet e tyre edhe jashtë orarit të lejuar.
Ne kemi parë shpesh se si policia ka bërë një sy qorr e një vesh shurdh, pa marrë asnjë lloj mase ndaj disa biznesve që kanë shkelur të gjithë rregullat e pandemisë, duke nisur nga shkeljae orarit e deri tek mosrespektimi i distancës. Lidhja e drejtpërdrejtë e disa biznesmenëve me qeverinë apo edhe dhënia e parave nën dorë, i ka lejuar shumë prej tyre të vazhdojnë të lirë aktivitetin. Nga ana tjetër ata më “të dobëtit” nuk kanë mundur të bëjnë asnjë lloj manovre, duke rrezikuar kështu falimentimin.
