Deri në këto momente që flasim në Shqipëri janë konfirmuar 33 të infektuar me Koronavirus, mes tyre edhe mjeku i parë në Durrës që pati kontakt me viktimën, 73-vjeçare.
Sot është dita e dytë e shtetrrethimit, një masë që u mor nga qeveria për të frenuar përhapjen e virusit. Kryeministri Edi Rama paralajmëroi se kufizimi i qarkullimit që qëndron sot për Durrësin dhe Tiranën me gjasë do të shtrihet edhe përtej së hënës por perimetri i zonave të izoluara do të rritet.
Nga dita e diel në 06:00 do të ndalohet jo vetëm qarkullimi brenda po edhe në rrugët nacionale që lidhin Vlorën me Fierin, Fierin me Lushnjen dhe Shkodrën me Lezhën, pra perimetri i mbrojtjes do të zgjerohet dhe do të ndalohet edhe qarkullimi mes Elbasanit dhe Korçës.
Kudo do të mbyllen po njësoj të gjitha lokalet dhe mjediset e mbyllura sipas kategorive në Tiranë dhe Durrës.
Dy raste në Kosovë me Koronavirus, nisin masat e para!
Qeveria e Kosovës ka marrë masa të reja mbrojtëse kundër infektimit me COVID-19, pas dy rasteve që u konfirmuan si pozitive me këtë virus.
Një 20-vjeçare nga Klina dhe një 77-vjeçar nga Vitia, e para shtetase italiane, ndërsa i dyti që kishte udhëtuar nga Italia për në Kosovë më 5 mars, janë të infektuarit e parë.
Kryeministri, Albin Kurti njoftoi se kanë marrë vendim të mbyllen të gjitha kafeteritë e lokalet e natës, si dhe të gjitha qendrat tregtare, e të pezullohen aktivitetet kulturore e sportive.
Qeveria e Kosovës ka marrë gjithashtu vendim të ndërpresë transportin ndër-urban.
4 persona pozitivë me Koronavirus në Dibër
“Katër pacientët nga Dibra që rezultuan pozitiv, akoma janë në Dibër në gjendje të qendrueshme dhe nesër do të sillen në Shkup dhe hospitalizohen në Klinikën për Sëmundje Infektive”, thonë nga Ministria e Shëndetësisë së Maqedonisë së Veriut.
Numri i të infektuarve nga Koronavirusi në Maqedoninë e Veriut ka arritur në 13.
250 viktima në ditë në Itali
Bilanci negativ i viktimave nga Koronavirusi në Itali ka arritur kulmin në këto 24 orët e fundit.
Numri i viktimave ka shkuar në 1266, që do të thotë se janë shënuar 250 viktima në ditë.
Rastet janë shtuar me 2116 duke e çuar në rreth 17660 numrin total të të infektuarve, ndërsa sa u përket të shëruarave janë 185 më shumë, duke e çuar numrin e përgjithshëm në 1439.
Qiproja mbyll kufijtë për 15 ditë
Qiproja do të mbyllë kufijtë për 15 ditë për çdo individ tjetër përveç qipriotëve, evropianëve dhe personave me leje speciale, në një masë paraprake kundër koronavirusit, tha Presidenti Nicos Anastasiades të premten.
Masa do të hynte në fuqi 15 Mars, tha ai në një deklaratë publike.
Lousiana, shteti i parë që shtyn zgjedhjet për shkak të Koronavirusit
Lousiana u bë shteti i parë në Shtetet e Bashkuara që shtyu një zgjedhje parësore presidenciale të planifikuar për shkak të shpërthimit të vazhdueshëm të Koronavirusit.
Votuesit në Lousiana do të votonin në 4 prill republikane për të zgjedhur kandidatët për zgjedhjet e përgjithshme të nëntorit.
Sekretari i Shtetit Kyle Ardoin tha se votimi do të zhvillohet në 20 qershor.
SHBA-të kanë shpallur Emergjencën Kombëtare.
Danimarka do të mbyllë kufijtë me të huajt
Danimarka do të mbyllë kufijtë e saj nga mesdita të shtunën për të huajt si një masë kjo për të frenuar përhapjen e Koronavirusit, tha kryeministri danez.
“Të gjithë turistët, të gjithë udhëtimet, të gjithë pushuesit dhe të gjithë të huajt që nuk mund të dëshmojnë një qëllim të besueshëm për të hyrë në Danimarkë, do t’u mohohet hyrja në kufirin danez,” tha Kryeministri Mette Frederiksen.
Mbyllja nuk do të zbatohej për transportin e mallrave, përfshirë ushqimet, ilaçet dhe furnizimet e industrisë.
India raporton vdekjen e dytë nga Koronavirusi
India njoftoi vdekjen e dytë nga Koronavirusi, tha Ministria e Shëndetësisë dhe Mirëqenies së Familjes.
Pacientja ishte një grua 68-vjeçare me diabet dhe hipertension dhe vdiq në kryeqytetin e vendit, New Delhi.
India, e cila ka një popullsi prej 1.3 miliardë, deri më tani ka raportuar 82 raste të konfirmuara të virusit.
OBSH: Evropa, qendra e epidemisë
Organizata Botërore e Shëndetit, e quajti një “moment historik tragjik” humbjen e mijëra personave në të gjithë botën nga Covid-19.
“Evropa tani është bërë epiqendra e pandemisë. Më shumë raste po raportohen tani çdo ditë sesa u raportuan në Kinë në kulmin e epidemisë”, tha kreu i OBSH-së në Gjenevë.
/Iconstyle.al
