Mbrëmjen e kaluar u regjistrua viktima e parë e infektuar me koronavirus në Itali.
Adriano Trevisan, 78 vjeç, ndërroi jetën në orën 22:45 në spitalin e Padova-s, ku po mbahej i izoluar prej 10 ditësh.
Këtë lajm e ka bërë të ditur guvernatori Luca Zaia për agjensinë e lajmeve “Ansa”.
Trevisan ishte njëri nga dy pacientët e infektuar me koronavirus në zonën e Veneto.
Gjithashtu, 15 të prekur nga virusi vdekjeprurës numërohen edhe në Lombardi.
Italia është vënë në alarm dhe qyteza e Lodi-t me 50 mijë banorë është futur në karantinë, ndërsa njerëzit po qëndrojnë në banesat e tyre.
Gjithashtu, në Piacenza janë ndaluar të gjitha aktivitetet sportive dhe kulturore, ndërsa priten të dhëna të tjera nga vendi fqinj.
