Numri i të infektuarve në Shqipëri nga Koronavirusi ka shkuar në 10 dhe situata se vjen edhe bëhet më problematike.
Nga institucionet edhe në media thuhen shpesh këshillat që duhet të ndjekim për të shmangur infektimin, megjithatë një rëndësi të veçantë duhet t’i kushtojmë ushqyerjes.
E ftuar në emisionin “Rreze Dielli” nutricionistja Enkeleda Ferrollari ka thënë se duhet të harrojmë mite të tilla si ‘rakia dhe hudhrat luftojnë koronavirusin’, por duhet të konsumojmë ushqime që rritin imunitetin.
“Nga paniku ka mite të ngritura. Dëgjohet gjithandej që konsumoni raki dhe hudhra. Abuzohet dhe njerëzit bien në kurthe që mund t’u kthehet mbrapsh. Ka shumë pak kohë që është shfaqur koronavirus, sa të kemi studime për ushqimet që bëjnë mirë për koronavirusin. Së dyti nuk ka asnjë ushqim që lufton një sëmundje të caktuar është e pamundur. Rekomandohet një dietë e ekuilibruar, një tërësi ushqimesh e kompletuar. Ka ushqime që bëjnë mirë për të forcuar imunitetitn, jo për të luftuar e zhdukur koronavirusin” shprehet në “Rreze Dielli” nutricionistja.
Ndër ushqimet që ajo rekomandon të konsumohen janë frutat dhe perimet kryesisht të stinës, qumështi, çajrat bimorë etj.
