Shqiptarët po pushtojnë artin nëpër botë dhe një tjetër lajm i bukur vjen nga Franca! Koreografi me origjinë shqiptare, Angjelin Perljocaj, raportohet se është zgjedhur anëtar i Akademisë Franceze të Arteve të Bukura.
Ndërsa arti dhe talenti i tij ka lënë gjurmë të pashlyeshme në skenat franceze dhe në vendet e tjera të botës, ai nuk e harroi kurrë prejardhjen e tij.
Ishte ish-ministrja e Kulturës, Mirela Kumbaro, e cila njoftoi përmes një postimi në Instagram, ndërsa shprehte vlerësimet e saj për koreografin e mirënjohur.
“Lajmet e mira për artistët që Shqipërinë e mbajnë me vete janë ato që na bëjnë krenarë, por edhe flasin për Shqipërinë që kemi dhe që duam! Angjelin Preljocaj, zgjidhet anëtar i Akademisë Franceze të Arteve të Bukura! Koreografi shqiptar që Shqipërinë e mban në zemër, ka qenë bashkudhëtari ynë në këto vite të skenës së baletit shqiptar, në Teatrin Kombëtar të Operës e Baletit. Vëllai i madh i balerinëve tanë, por dhe një mik e këshilltar i paçmuar të cilit i jam pafundimisht e personalisht mirënjohëse! Urime me zemër nga Shqipëria jote e vogël dhe e madhe Angjelin!”, shkruhet në statusin e saj.
