Një ditë më parë “Iconstyle.al” riktheu ndër mend trendin me të cilin u dallua Aurela Hoxha disa ditë më parë, kombinimi i rrjetës me kapelën me strehë (bejsbolli). Këtë trend, që tërhoqi vëmendjen e të gjithëve në eventin e organizuar për 20-vjetorin e emisionit “Opinion”, e kemi parë tre vite më parë nga Rihanna.
Këngëtarja me famë botërore u shfaq e veshur me një kostum të zi dhe me aksesorin e kapelës dhe rrjetës më 2 mars të vitit 2014-të, në Francë. Rihanna kishte zgjedhur këtë veshje për të marrë pjesë në shfaqjen e “Givenchy” vjeshtë/dimër, gjatë Javës së Modës në Paris.
Por për të vërtetuar faktin se në fakt frymëzimi i Aurelës nuk ka qenë Rihanna, por dashuria e saj për këtë kombinim, “show-girl”-i shqiptar ripublikon disa nga paraqitjet e saj ndër vite, për të cilat kishte zgjedhur të shtonte dy aksesorët: kapelën dhe rrjetën.
Kombinimi i këtyre dy aksesorëve mbetet prej vitesh në historinë e modës dhe i përhapur mbi të gjitha si një kod veshje në mbledhjet e aristokratëve.
Aurela tregon përmes fotove të publikuara në “InstaStory” se, këtë trend e ka përqafuar që në vitin 2015, të kombinuar në mënyrë elegante.
Gjithashtu ka ndjekur kodin e veshjes në po të njëjtin vit për 77-vjetorin e martesës mbretërore.
E veshur me një fustan të zi elegant dhe rripin shkëlqyes për të nxjerrë në pah linjat e saj, zgjedhja e kapelës së zezë të kombinuar me rrjetën plotësonin paraqitjen e Aurelës.
Por detaji i rrjetës duket se është shumë i pëlqyer prej saj. Pasi edhe në vitin 2016, kur u shfaq gjatë Javës së Modës në Paris, Aurela e kishte zgjedhur si aksesor, por të kombinuar me një fjongo.
Në tre vite të ndryshme, Aurela Hoxha e solli këtë aksesor të kombinuar në tre mënyra të ndryshme.
Me kapelë apo me fjongo? Cila ju përshtatet më mirë mbetet në zgjedhjen tuaj!
Burimi: Iconstyle.al
