Profesori i Universitetit Bujqësor të Tiranës, Gjok Vuksani, ka ngritur një shqetësim që lidhet me sigurinë ushqimore. Teksa ishte i ftuar mëngjesin e sotëm në “Dita Jonë”, ai deklaroi se në Autoritetin Kombëtar të Ushqimit për Tiranën që kontrollon ushqimin e gati 1 milionë shqiptarëve, në sektorin e mbrojtjes së bimëve dhe imputeve bujqësore, ka vetëm një agronom.
Sipas tij, problemi qëndron tek stafi, pasi thotë se 64% e stafit të kësaj agjencie janë jashtë profilit që u takon.
“Ne nuk është se kemi prodhim dhe nuk është cilësor. Ne po themi që kemi një uri të jashtëzakonshme të Bujqësisë shqiptare për hortikulturistë dhe veterinerë. Po ju jap një shembull: Në Autoritetin Kombëtar të Ushqimit për Tiranën që kontrollon ushqimin e gati 1 milionë shqiptarëve në Tiranë, në sektorin e mbrojtjes së bimëve dhe imputeve bujqësore, që duhet të jenë të gjithë agronomë, ka vetëm një agronom. Problemi është i tillë, sipas një studimi të 2022 te Agjencia e Pagesave të Industrisë së Bujqësisë që jep subvencionet, 64% e stafit të kësaj agjencie janë jashtë profilit. Thënë ndryshe ata i kanë zënë vendin e punës një studenti që ka mbarur tek unë apo te Ekonomiku në Tiranë. Në qoftë se je kontrollor për blegtorinë, duhet të jesh ose veteriner, ose zooteknik dhe duhet të kesh mbaruar bachelor-in dhe masterin. Vetëm ai është i zoti, ka aftësi që të përshkruajë me një akt kontrolli investimin. Por në vendin e tij mund të jetë një jurist, apo një teknolog që nuk ka aftësi profesionale për të bërë këtë punë. Ky është problemi kryesor, që ta kapim demin nga brirët”, tha Vuksani.
Profesori evidentoi edhe problemin e nepotizmit në punësimin e të rinjve, duke thënë se ata fillimisht duhet t’i shërbejnë një partie politike përpara se të jenë specialistë të denjë të një fushe të caktuar.
“Nuk ka meritokraci në vendin e punës. Një student që mbaron shkollën është më pak i prirur për t’u marrë në punë nëse nuk ka lidhje me një parti politike. Sidomos me partitë politike që janë në pushtet. Një student një specialist përveçse duhet të jetë specialist duhet t’i shërbejë edhe partisë politike, duhet të marrë vota që të punojë”,- shtoi ai më tej.
Ky është një skandal tjetër që del në dritë për AKU (Autoriteti Kombëtar i Ushqimit) dhe përgjegjësit për sigurinë e ushqimeve, të cilët vazhdojnë të “kyçin gojën” para skandaleve të tregtimit të ushqimeve, por edhe të shkeljeve që bëhen brenda vetë institucionit.
