Në kuadër të zhvillimit të Konferencës së NATO-s për Mbrojtjen Kibernetike, e cila do të mbahet nga 8 deri më 10 tetor 2025 në Pallatin e Kongreseve, Tiranë, Policia e Tiranës ka përgatitur një plan të posaçëm masash sigurie për të garantuar mbarëvajtjen e aktivitetit dhe rendin publik.
Sipas njoftimit zyrtar, për shkak të pranisë së delegacioneve të larta ndërkombëtare dhe nivelit të lartë të sigurisë që kërkon një aktivitet i tillë, do të vendosen kufizime në qarkullimin e automjeteve dhe këmbësorëve në disa nga zonat më të frekuentuara të kryeqytetit.
Rrugët ku ndalohet qarkullimi i automjeteve:
- Bulevardi “Dëshmorët e Kombit”, nga semafori pranë Presidencës deri te sheshi “Nënë Tereza”, duke përfshirë edhe vetë sheshin;
- Rruga “Gjergj Filipi”;
- Aksi që lidh hotelin “Marriott” me bulevardin “Dëshmorët e Kombit”.
Ndërkohë, për këmbësorët do të jetë i mbyllur trotuari nga hyrja e hotelit “Rogner” deri te Pallati i Kongreseve, gjatë gjithë kohëzgjatjes së konferencës.
Kufizimet do të jenë në fuqi nga ora 07:00 e datës 9 tetor deri në ora 15:00 të datës 10 tetor 2025.
Policia e Tiranës u bën thirrje qytetarëve për mirëkuptim dhe bashkëpunim, duke i ftuar që të shmangin lëvizjet e panevojshme në zonat e kufizuara dhe të respektojnë udhëzimet e punonjësve të policisë dhe sinjalistikën rrugore.
Ky plan masash synon të garantojë sigurinë e pjesëmarrësve dhe zhvillimin normal të një prej ngjarjeve më të rëndësishme ndërkombëtare që pritet të mbahet në Tiranë.
