Në vetëm pak vite, gjigandi kinez i rrobave ‘Shein’ po dominon tregun për blerësit, duke ofruar varietete të veshjeve trend por më të lira. Ishte pikërisht kjo arsyeja pse kjo markë u bë aq e famshme pasi tashmë të gjithë mund të vishnin dizajnin e preferuar por me çmim shumë herë më të vogël.
Po kjo ka bërë që firma të marrë një listë të gjatë ankesash për vjedhje të të drejtave të autorit nga markat e mëdha dhe stilistët. Kompania vlerësohet më shumë se 100 miliardë dollarë në treg dhe mbështetet nga investitorë të mëdhenj. Tashme ajo është sjellë në gjykatë në tre vitet e fundit, në të paktën 50 padi federale në SHBA që pretendojnë shkelje të markës tregtare ose të së drejtës së autorit, sipas të dhënave publike.
Paditësit variojnë nga dizajnerët e vegjël që operojnë në studio shtëpiake deri tek gjigantët e shitjes, duke përfshirë firma si ‘Ralph Lauren’ dhe prodhuesin e syzeve të diellit ‘Oakley’, tregojnë të dhënat e gjykatës. Shumë stilistë të pavarur kanë shfrytëzuar rrjetet sociale të ankohen për produktet ose modelet të krijuara nga ata por që janë shfaqur për shitje nga ‘Shein’ pa leje.
Në shumë raste, ‘Shein’ ka arritur marrëveshje larg syrit të publikut, shpesh për shuma të pazbuluara, tregojnë të dhënat e gjykatës. Në disa raste, ‘Shein’ i është përgjigjur ankesave për dështimin e punës së tyre duke fajësuar furnizuesit e palëve të treta, thonë ankuesit. Kompania thotë se çdo shkelje nuk është e qëllimshme.
