Pas blerjes së ABCom, operatorit më të madh kabllor në vend, Vodafone ka zgjeruar terrenin, këtë herë duke blerë një tjetër operator që ofron shërbime të komunikimeve elektronike kryesisht transmetime televizive kabllore. Bëhet fjalë për “ApNet SHPK” nga shoqëria ABCom SHPK sipas një kontrate të 6 marsit të këtij viti. Lidhur me këtë blerje Autoriteti i Konkurrencës është njoftuar në muajin korrik.
Shitja e ABCom tek Vodafone
Kujtojmë se nënshkimi i marrëveshjes mes Vodafone dhe ABCom nisi në fund të vitit 2019. Në atë kohë Vodafone argumentoi se blerja lidhej me zgjerimin e shërbimeve të teknologjisë fikse,TV dhe Internet fiks. Marrëveshja u miratua në datë 7 shkurt dhe qartazi çdo lëvizje e Vodafone lidhet me forcimin e pozitave në treg, çka i jep përparësi në abuzimin me çmimet pa përmirësuar shërbimet.
E kjo është vërtetuar disa herë. Pafund klientë ankohen për shërbimin aspak cilësor të internetit, që marrin nga “Abcom”, teksa të shumtë janë ata që as nuk kanë mundur ta marrin shërbimin me fibër optike.
Në pikat e shitjes shitësit ofrojnë si alternativë të vetme “zgjidhjeje”, t’u ofrojnë klientëve familjarë që presin internet me fibër optike vetëm opsionin e abonimit si “biznes”. Justifikimi është se kompania e ka të pamundur që të instalojë nëpër pallate dhe zona të ndryshme të kryeqytetit linjat e fibrave optike, dhe në rastin më të volitshëm këshillohen linjat e “dedikuara” që zakonisht u lidhen subjekteve të biznesit, por që kushtojnë më shtrenjtë se paketat për konsumatorin familjar.
Është ironik fakti se nga njëra anë suporti teknik i kompanisë “Abcom” ankohet se nuk ka mundësinë e instalimit të fibrave optike nëpër pallate dhe abonentë familjarë, dhe nga ana tjetër dyqanet e “Vodafone-Albania” sugjerojnë se po pagove si biznes, linja të lidhet menjëherë.
Kjo gjë nuk e bën aspak serioze dhe konkurruese kompaninë që pretendon se është më e madhja e shërbimit celular në vend, por që në sytë e klientëve dhe pajtimtarëve po shfaqet për ditë e më tepër si kompani mashtruese, ose aspak korrekte. Abuzime të shumta ka edhe me fuqinë e Internetit dhe qytetarët ankohen se edhe pse paguajnë një shumë të caktuar për shërbimin nga “Vodafone-Albania” për një kapacitet të caktuar, ai nuk është asnjëherë në masën e duhur.
Investimi 500 mln euro
Në një kohë që të gjithë jemi bërë dëshmitarë të skandaleve të njëpasnjëshme të një prej operatorëve celularë më të mëdhenj në vend, Vodafone Albania, ky i fundit ka bërë në korrik një lajmërim për një investim që thuhet se do të ndryshojë rrënjësisht cilësinë e shërbimeve fikse dhe TV për klientët shqiptarë.
Plot 500 milionë euro është shifra e majme që operatori celular ka njoftuar se do të investojë në infrastrukturën e rrjetit, pasi ka hyrë në tregun e telefonisë dhe internetit fiks, duke blerë aksionet e Abcom.
Nëse Vodafone Albania ka lajmëruar se do të bëjë një investim prej 500 milionë eurosh në infrastrukturën e rrjetit atëherë pse deklaron humbje?
Së pari, kompania ka zgjeruar aktivitetin e saj me blerjen e operatorit fiks Abcom, ndërkohë që nuk po bën asgjë për t’i faturuar më pak klientët e vet. Së dyti, ajo që të bën të reflektosh është fakti që, si ka mundësi që po investohet një shumë e majme në infrastrukturën e rrjetit, në një kohë që Vodafone ka thelluar humbjet në vitet e fundit. Rrjedhimisht lind dyshimi nëse thellimi dhe deklarimi i humbjeve, lidhet ose jo me mospagimin e taksave!
Por nëse Vodafone Albania do që të investojë në tregun shqiptar 500 milionë euro, më e pakta që mund të bëjë është të jetë transparent me investimet, të përcaktojë qartazi kategoritë se ku do të investojë, që nga investimet në infrastrukturën e rrjetit e deri te reklamat, apo burimet njerëzore.
Shqiptarët kanë vite që presin një lloj shërbimi ose përfitimi më të mirë si përgjigje për paratë që paguajnë, por mbajnë në kurriz vetëm korrupsion dhe gënjeshtra.
Duke marë parasysh këto të ardhura, të deklaruara nga vetë kompania në fjalë, asaj do i duheshin mbi dy dekada, duke mos përfshirë asnjë shpenzim tjetër, në mënyrë që të bënte një investim të tillë.
Dy janë skemat që fshihen pas kësaj deklarate të bërë me krenari nga Vodafone në verë të këtij viti.
E para, Vodafone po mashtron sërish qytetarët shqiptarë, duke dhënë premtime që nuk i mban dot.
E dyta, Vodafone po mashtron qytetarët dhe shtetin shqiptar në deklarimin e të ardhurave duke deklaruar shumë më pak nga ç’fiton realisht.
Në të dyja rastet kemi të bëjmë me shkelje të ligjit dhe duhet hetim nga Autoriteti i Komunikimeve Elektronike dhe Postare (AKEP).
