Kompania “Vodafone Albania”, jo vetëm që është bërë mjaft problematike për klientët e saj me çmimet abuzive dhe me shërbimin që le për të dëshiruar, por tashmë bëhet pengesë për ata që duan të largohen prej saj.
Sikundër e dimë, ndonëse në vendin tonë janë vetëm 3 kompani celulare, konsumatorët kanë të drejtë të kalojnë nga njëra tek tjetra duke përdorur të njëjtin numër, pra kartë SIM.
Së fundmi, në redaksinë tonë ka ardhur një denoncim nga një qytetar i cili i pakënaqur nga shërbimi i “Vodafone” ka vendosur të largohet nga kjo kompani telefonike.
Pasi ka kryer të gjitha detyrimet ndaj “Vodafone” ka bërë edhe kërkesën ligjore për të kaluar në “One”. Mirëpo, prej ditësh kërkesa e tij nuk po plotësohet.
Pas komunikimeve të vazhdueshme me “One”, i është bërë me dije se “fjalën e fundit” e thotë pikërisht “Vodafone”. Ky i fundit nuk po i jep dritën jeshile që ai të kalojë në kompaninë tjetër telefonike.
Sikundër mund ta shihni edhe në dokumentat dhe mesazhet e mëposhtme, çdo procedurë është kryer në përputhje me ligjin dhe duke iu përmbajtur të drejtave dhe detyrimeve të konsumatorit.
Si “Vodafone” po thyen ligjin nëpërmjet këtij veprimi?
Fakti që “Vodafone Albania” nuk lejon kalimin e klientit në një kompani tjetër celulare konsiderohet imponim i preferencave të tij dhe kjo gjë është e ndaluar me ligj.
Duke shkelur lirinë e të drejtës për të zgjedhur dhe për të ndërruar operator telefonik sipas përzgjedhjes që klienti dëshiron, “Vodafone” kryen pengesë me paramendim. Vlen të theksohet se kjo procedurë normalisht kërkon vetëm të bësh kërkesën për tu larguar në pikën qendrore të “Vodafone”.
Ndërkohë, për rastin në fjalë, kemi të bëjmë me një procedurë që zgjat disa ditë me radhë.
Edhe në këtë rast, ashtu si në çdo shkelje dhe abuzim tjetër, ndërhyrja e Autoritetit të Konkurrencës është e pashmangshme. AK duhet të luajë rolin e rregullatorit dhe të lehtësojë të gjitha procedurat në të mirë të qytetarëve dhe jo t’i japë liri veprimi kompanive celulare të sillen në kundërshtim me Kushtetutën, duke dëmtuar konsumatorët.
Në mënyrë të qartë Autoriteti i Komunikimeve Elektronike dhe Postare që lidhet drejtpërdrejtë me çështjen, me veprimet dhe mosveprimet e tyre i shërbejnë interesave të tilla me shenja të qarta subjektivizmi dhe korrupsioni.
Është pikërisht Neni 7 i Ligjit Nr.9918, datë 19.5.2008 (I ndryshuar) “PËR KOMUNIKIMET ELEKTRONIKE” që e detyron AKEP-in”:
Të nxisë konkurrencën efiçente për sigurimin e rrjeteve dhe të shërbimeve të komunikimeve elektronike, facilitetet shoqëruese dhe shërbimet e tjera:
ç) për të siguruar konkurrencën e lirë dhe efektive në sektorin e komunikimeve elektronike.
Një veprim i tillë padyshim shmang konkurrencën e drejtë në treg. Kjo nuk është thjesht e gabuar në planin moral dhe etik, por bie në kundërshtim të plotë me ligjin Nr.9918, datë 19.5.2008 (I ndryshuar) “PËR KOMUNIKIMET ELEKTRONIKE”. (LEXO KËTU TË PLOTË)
Po ashtu, lidhur me faktin se “Vodafone” po imponon dëshirat e konsumatorëve, këtë e rregullon LIGJI Nr.9902, datë 17.4.2008 PËR MBROJTJEN E KONSUMATORËVE, ku Neni 16 për “Praktikat tregtare agresive” parashikon se:
-
Një praktikë tregtare është agresive kur, duke konsideruar të gjitha tiparet dhe rrethanat e saj, dobëson apo ka mundësi të dobësojë ndjeshëm lirinë e zgjedhjes ose sjelljen e konsumatorit për mallin apo shërbimin, nëpërmjet ushtrimit të dhunës psikike dhe/ose fizike, ose ndikimit të tepruar dhe në këtë mënyrë e shtyn konsumatorin të marrë një vendim, të cilin, në të kundërt, nuk do ta kishte marrë.
-
Për të përcaktuar nëse një praktikë tregtare përdor dhunën psikike dhe/ose fizike, ose ndikimin e tepruar, merren parasysh:
ç) çdo pengesë e vështirë ose e shpërpjesëtuar jokontraktuale, e vendosur nga tregtari, kur një konsumator dëshiron të ushtrojë të drejta sipas kontratës, përfshirë të drejtat e përfundimit të kontratës apo të këmbimit me një mall apo shërbim tjetër ose tregtar tjetër.
Çfarë bën vetë Vodafone, duke shkelur privatësinë dhe konkurrencën?
Kompania telefonike ‘Vodafone’ prej kohësh ka nisur një ‘fushatë’, ku telefonon abonentët e dy kompanive të tjera telefonike praktikisht ‘One Telecommunication’ dhe ‘Albtelecom’, duke ju ofruar atyre mundësinë e artë për tu bërë pjesë e kompanisë së tyre.
Një veprim i tillë padyshim shmang konkurrencën e drejtë në treg.
Të telefonosh klientët e një kompanie tjetër telefonike është, përveçse një shkelje flagrante e etikës, standardeve profesionale, shkelje edhe e ligjit të privatësisë nga ana e kompanisë ‘Vodafone’.
Nuk dihet se si kjo kompani i ka siguruar të dhënat personale të personave që telefonon dhe se me çfarë të drejte mund të ndërhyjë tek këto të dhëna.
Një gjë e tillë parashikohet edhe në LIGJIN Nr.9887, datë 10.3.2008 PËR MBROJTJEN E TË DHËNAVE PERSONALE (LEXO KËTU TË PLOTË),ku Neni 5 për “Mbrojtja e të dhënave personale” thotë se “Mbrojtja e të dhënave personale bazohet: në përpunimin në mënyrë të ndershme, të drejtë dhe të ligjshme; në grumbullimin për qëllime specifike, të përcaktuara qartë, e legjitime dhe në përpunimin në përputhje me këto qëllime.
Pra, “Vodafone”po luan me standarte të dyfishta, ku nga njëra anë po tenton t’i marrë klientët e operatorëve të tjerë, kurse nga ana tjetër klientët e tij të pakënaqur nuk i lejon që të largohen.
