Mbrëmjen e të mërkurës, Kobe Bryant i tha “lamtumirë” NBA-s dhe Los Angeles në stilin e tij. Pasi fitoi 60 pikë në ndeshjen e tij të fundit në NBA për të udhëhequr Lakers drejt fitores ndaj Utah Jazz, Bryant shkoi në qendër të fushës dhe tha: “Mamba largohet”. Duket se Kobe mori një unazë të veçantë para se të dilte për lojën e fundit.
Largohet në këtë mënyrë një basketbollist i dashuruar dhe i urryer në të njëjtën kohë, i cili ka kaluar 20 vite me të njëjtën skuadër. 1346 ndeshje, 48637 minuta, 33643 pikë, 5 unaza kampioni, 2 tituj si lojtari më i mirë i Finaleve…
Shifra marramendëse që i rezervojnë një vend në Olimpin e Zotave. Aty ku janë Chamberlain, Russell, Bird, Magic dhe mbi të gjitha Jordan, të cilin Kobe Bryant u mundua ta arrinte me këmbëngulje të madhe. Kobe ishte i vetmi i një brezi të humbur që guxoi të rikthente kujtimet e lojtarit më të madh që ka parë basketbolli ndonjëherë.
Në “Staples Center” të Los Angeles ishin të pranishëm për ndeshjen e fundit të tij Magic Johnson, Shaquille O’Neal, Snopp Dog, Jack Nicholson, Jay-Z… Të gjithë donin të shikonin 42 minutat e fundit të Bryant. Kobe i bëri të gjitha. Donte t’i bënte të gjitha. Shokët e tij donin që ai t’i bënte të gjitha. E kishte detyrë ndaj të pranishmëve, ndaj NBA dhe ndaj vetes.
Burimi: Elite Daily
