Nëse nuk e keni vizituar ndonjëherë, atëherë me siguri keni dëgjuar për Kanionin e Holtës. Një lajm të keq për çdokënd që do të dëshironte të shijonte bukurinë e natyrës që ofron ajo zonë, pasi do të shkatërrohet për t’i hapur vendin një hidrocentrali.
Pavarësisht se është një nga zonat e mbrojtura nga qeveria, tashmë është vendosur që të shfrytëzohet nga një palë e tretë.
Punimet kanë nisur prej rreth dy muajsh dhe në hyrje të tyre qëndron një tabelë, e cila informon lidhur me ndryshimin. Në të shkruhet se pikërisht në këtë kanion do të ndërtohet hidrocentrali “STRORI”. Përfitues është një kompani private, që pritet të shpenzojë rreth 460 milionë lekë dhe projekti përfundon pas dy vitesh, më 8 tetor të 2020-s.
Kanioni i Holtës ishte kthyer në një nga destinacionet turistike më të frekuentuara, jo vetëm nga shqiptarët, por edhe nga të huajt. Ndërsa nga ana tjerë falë turizmit përfituan edhe banorët e zonave duke ngritur biznese shërbimi për vizitorët e shumtë.
Sipas Bashkisë së Gramsh 14.500 turistë vizituan zonën vetëm gjatë vitit 2018, ku rreth 3 mije ishin të interesuar për Kanionin e Holës.
