Mbrëmjen e kaluar, në “Vizion Plus” nisi transmetimin emisioni më i ri “Këndo këngën time”, ku këngëtarë të famshëm shqiptarë do të vihen përballë talenteve të reja që do të këndojnë këngët e tyre.
Në mesin e këngëtarëve do të jetë edhe Aurela Gaçe, e cila natën e parë të spektaklit ka rrëfyer historinë e problemit të saj me zërin.
Këngëtarja rrëfeu se në fillimet e saj nuk kishte ditur të punonte me zërin dhe nëse s’do të kishte marrë mjekimet e duhura dhe të kishte mbajtur regjim, sot s’do ta shihnim më si këngëtare.
“Kam shkuar dhe jam vizituar tek një nga mjeket më në zë, e cila kujdeset për të gjithë këngëtarët e Brodway-t dhe të gjithë spikerët më në zë. Kur kam shkuar tek doktoresha më tha kështu: “Sa këngë këndon?” I thashë: “Jo, ne nuk këndojmë me këngë, ne e kemi me orë.
I thërrita vetes dhe aty kam pasur frikën më të madhe se mos unë nuk do të mundesha më të dilja më në skenë. Më tha: “Ose do të stoposh tani dhe do të bësh këtë që të them unë, ose ti edhe dy vjet jetë ke në skenë artistikisht”.
Aty thashë “do bëj çfarë të duash ti”. Stopova tre muaj. Dy javët e para më ka mbajtur me ilaçe, tre muaj nuk kam kënduar absolutisht, me ditë të tëra nuk kam folur. Më ka pyetur mjekja “Sa shumë e do muzikën?”. I kam thënë: “Eshtë baraz me jetën time. S’do të mund të jetoja, nëse s’do të këndoja”. Që nga ai moment, në mënyrë sistematike, unë stërvitem për zërin tim.”- ka rrëfyer këngëtarja.
