Kim Kardashian deklaroi se do t’i dedikohet karrierës në drejtësi. Teksa po përgatit një reality show ku do ta shikojmë krejt ndryshe në petkun e avokates (lexo këtu), ylli i rrjeteve sociale tregoi se po qëndron pa gjumë, vetëm për të studiuar.
Sapo është bërë nënë për herë të katërt, e megjithatë, kjo s’mund ta pengojë të vijojë karrierën që ka ëndërruar që e vogël.
“Po studioj ndërsa bebja fle”, shkroi 38-vjeçarja në një story në Instagram.
Gjithashtu, ajo publikoi një video ku tregon se stafi i saj i avokatëve mbajnë veshur bluza ku shkruhet: “Kim është avokatja ime”.
Por, më i pazakontë nga çdo gjë tjetër është testi përgatitor në të cilin Kim Kardashian po ushtrohej për provimin që do t’i japë të drejtën e ushtrimit të profesionit.
Ashtu si ushtrimet e matematikës në fillore që na mësonin të llogarisnim me mollë, ushtrimet e Kim-it e mësojnë të mendojë në mënyrë ligjore duke ia shtruar çështjet me emrat e personazheve të famshëm.
“Justin Bieber-i importon vepra arti. Për shumë vite, ai ka blerë dhe shitur me vetëdije vepra arti të vjedhura nga muze të vegjël në Timberlake. Bieber-i drejton një galeri arti në shtetin Bieberville, në partneritet me shokët Zayn, Niall dhe Harry.”
Këta janë emrat e tre ish-pjestarëve të grupit “One Direction”, Zayn Malik, Niall Horan dhe Harry Styles.
Ky ishte një rast hipotetik, siç bëhet shpesh në provimet e juridikut.
Provimin vendimtar për avokati ajo do ta japë në vitin 2022, pa ndjekur studimet universitare.
Kjo shkaktoi polemikë e megjithatë, shteti i Kalifornisë nuk e ka të domosdoshme ndjekien e studimeve në universitetin e drejtësisë, si kusht për të hyrë në provimin e licencës.
Qëllimi i Kim Kardashian është të sigurojë lirinë dhe të drejtat e të dënuarve për krime të lehta, si përshembull shitja e narkotikëve në sasi të vogla.
Babai i saj, Robert Kardashian, ka qenë avokat dhe Kim është shprehur se gjithmonë ka dashur të vijojë në hapat e tij, por ai nuk ia këshilloi për shkak se e konsideronte një punë me shumë stres.
