Kim Kardashian është grabitur me armë në një apartament në Paris të hënën herët në mëngjes.
35- vjeçarja kishte me vete bizhuteri me vlerë 11 milionë dollarë të cilat u grabitën nga të paktën dy burra të armatosur, të maskuar dhe të veshur si policë. Grabitësit rrëmbyen një kuti stolish me vlerë 6.7 milionë dollarë dhe një unazë me vlerë 4,5 milionë dollarë, shkruan “Daily Mail”.
Rreth orës 2:30 të mëngjesit , grabitësit hynë në ndërtesë dhe prangosën rojen. Ata më pas hynë në dhomën e Kimit, e kërcënuan atë me armë dhe e lidhën në banjo.
Nëna e dy fëmijëve, e cila ndodhet në Paris për Javën e Modës, është “tronditur keq, por nuk është dëmtuar fizikisht”, tha një burim për “DailyMail”. Fatmirësisht, vajza e tyre, North, 3 vjeç dhe djali 10-muajsh Saint, nuk ishin në dhomë në atë kohë.
Bashkëshorti i saj, Kanye West i cili ishte në koncert në Festivalin e Artit, New York, e ndërpreu menjëherë performancën dhe u largua menjëherë. Në videon e publikuar nga koncerti, shihet një asistent që i afrohet dhe i jep lajmin. Më pas Kanye thotë: “Më vjen keq, kam një emergjencë duhet të ndërpres shfaqjen”.
Një fotograf, i cili e ka ndjekur Kim që kur ajo arriti në Paris, është marrë në pyetje nga policia. Ai thuhet se ka mundur të hyjë në një restorant ku ajo dhe familja e saj ishin duke ngrënë gjatë javës së kaluar, duke u paraqitur si një polic.
