Reality show “Keeping Up With The Kardashians” po përgatitet të ulë siparin dhe për këtë sezon duke paralajmëruar një finale spektakolare me dy episode dhe sigurisht, ëmbëlsira është lënë për në fund.
Vetëm se ëmbëlsira kësaj radhe do të ketë një shije disi të hidhur pasi produksioni ka vendosur të transmetojë në serinë e fundit pikërisht skandalin e tradhtisë mes Jordyn Woods (ish-shoqe e ngushtë me Kylie Jenner) dhe Tristan Thompson (ish-partneri i Khloe Kardashian, njëkohësisht babai i vajzës së saj).
Në serinë në fjalë, një pjesë të së cilës e kemi parë në trailerin e nisjes së sezonit, Khloe shihet duke qarë e duke bërtitur teksa mësoi lajmin dramatik të tradhtisë.
Mirëpo, teksa shumëkush mund të mendonte se Jordyn Woods do të donte të zhdukej nga faqja e dheut prej sikletit, ish-shoqja e ngushtë e Kylie Jenner i ka surprizuar të gjithë duke e komentuar madje në një intervistë televizive puntatën e shumëpritur të KUWTK.
E pyetur se çfarë kishte menduar kur kishte parë përmbledhjen paraprake, Jordyn u shpreh: “Gjithësecili ka të vërtetën e vet dhe historinë e vet, kështu që thjesht bën përpara. Gjithëkush ka të drejtë të tregojë të vërtetën e vet.”
Ndërsa e pyetur se si mendon se do të portretizohet në episodin në fjalë, ajo u përgjigj duke thënë se shpreson të dalë si vetvetja. “Jeta vazhdon. Paraja nuk ndalon. Bota nuk ndalon. Shpresoj që të gjithë të bëjmë përpara.”-ka shtuar më tej Woods.
