Trendit të komunikimit me qytetarët nëpërmjet videove live në rrjetet sociale i është bashkuar edhe kreu i Urgjencës Kombëtare, Skënder Brataj, i cili pasditeve ndan me qytetarët në Facebook informacione rreth pandemisë.
Pasditen e djeshme Brataj këshilloi si të sillemi me koronavirusin, që tashmë na është kthyer në mënyrë jetese, si edhe tregoi planin për daljen nga izolimi.
Ndërsa sot, mjeku ndau informacione të rëndësishëm për të gjithë qytetarët lidhur me dhimbjen e gjoksit, duke thënë se çdo dhimbje gjoksi duhet konsideruar si atak kardiak dhe nuk duhet neglizhuar.
Teksa sqaroi shenjat e para të arrestit kardiak, Brataj theksoi se duhet shkuar menjëherë në spital, pasi nëse kalojnë 10 minuta nga arresti, njeriu pëson dëmtime të pakthyeshme dhe mbetet gjithë jetën në koma.
“Njerëzit nuk duhet ta neglizhojnë dhimbjen e gjoksit. Nga 6 deri në 10 minuta, truri i njeriut fillon të pësojë dëmtime. Kjo çon në rrezik të jetës, por edhe në invalitet shumë të madh. Pas 10 minutash, dëmtimet janë të pakthyeshme, që do të thotë se personi mund të kthehet në jetë, por nuk do të zgjohet asnjëherë, pra do të jetë gjithë jetën në koma. Në një vit, në Shqipëri vdesin 3 mijë njerëz nga dhimbja e gjoksit”, tha Brataj.
Si ta njohim atë?
Numri 1 i Urgjencës tregon se para se personi të pësojë arrest kardiak, ka një periudhë të shkurtër që i shfaqen shenjat, dhe nëse nuk shkon në spital, mund të rrezikojë jetën.
Nëse keni dhimbje gjoksi, sidomos kur zgjat mbi 20 minuta, dhimbje që drejtohet drejt nofullave, shpatullave, qafës, në përqindjen më të madhe është problem kardiak.
Djersitje, lodhje, sidomos kur e ndjejmë dhimbjen në qetësi është akoma më e rrezikshme.
Çdo gjimbje gjoksi konsiderojeni kardiak, ndërsa sipas tij Covid-19 nuk ka lidhje me dhimbjen e gjoksit, por ka shenja të tjera.
Kujtojmë se Skënder Brataj, ka ardhur nga Italia për të marrë në dorë Urgjencën Kombëtare në vendin tonë, teksa disa javë më parë u infektua nga koronavirusi, por arriti ta mposhte atë. /gazetareforma
