Situata duket tejet alarmante në vendin tonë, ku çdo ditë vendosen rekorde të reja infektimesh nga Covid-19, dhe ditën e sotme u raportuan 711 raste të reja.
Kështu, ditën e djeshme Komiteti Teknik i Ekspertëve ka vendosur 3 masa të reja për parandalimin e përhapjes së mëtejshme të Covid-19 në vend. Përfaqësuesja e komitetit, Albana Fico, ka deklaruar se duke parë situatën është parë e nevojshme që të merren masa shtesë nga ekspertët.
3 masat e reja anti-Covid janë si më poshtë:
1.Ndalohen grumbullimet me më shumë se 10 persona në vende të hapura dhe të mbyllura.
2.Ndalohen mbledhjet partiake dhe tubimet.
3.Konferencat, ceremonitë e festave, ceremonitë martesore dhe organizimet përtej familjare të ceremonive mortore, deri në një urdhër të dytë.
Së fundmi, kreu i Task-Forcës Arben Gjata ka dhënë një intervistë për Euronews, ku ka thënë se tre muajt e ardhshëm do të jenë sfida më e madhe që ka kaluar ndonjëherë sisitemi shëndetësor.
Në këtë sfidë, sipas rektorit të Universitetit të Mjekësisë, bluzat e bardha do bëjnë maksimumin, teksa aleatët më të mëdhenj quajti qytetarët.
Besoj se jemi në prag të një situatë kritike ku kemi një rritje të lartë të numrave dhe nuk është se nuk e prisnim. Këto tre muaj do të jenë sfida më e madhe që ka kaluar ndonjëherë shëndetësia shqiptare ndoshta që në periudhat e hershme të krijimit të saj. Kërkon angazhim maksimal dhe solidaritet të stafit mjekësor. Besoj se qoftë mjekët dhe infermierët do të jenë të gatshëm që t’i bashkohen kësaj sfide pasi është sfida më e madhe që ka pasur ndonjëherë mjekësia shqiptare. Aleatët më të mëdhenj mund të jenë vetëm qytetarët shqiptarë”- tha ai për Euronews.
Sipas tij, nëse ndizet drita e kuqe e kolapsit të shëndetësisë mund të kemi mbyllje totale. Pra, kur kapacitetet në spitale të fillojnë të ezaurohen.
