Këtë vit “Kënga Magjike” shënon edicionin e saj të 23-të. Në gjithë këto vite ky Festival ka pritur shumë artistë të njohur, artist të rinj shqiptar dhe jo vetëm edhe nga e gjithë bota.
Përpos këngëtarëve, Festivali është edhe promotor i figurave të ndryshme mediatike në bashkëprezantim krah Ardit Gjebreas.
Së fundmi, faqja zyrtare e “Këngës Magjike” në Instagram ka zbuluar emrat e bashkëprezantueseve të edicionit të 23-të. Bëhet fjalë për moderatoren Eva Murati dhe aktoren e re Olta Beqiri.
Dy vajzat e televizionit do të bashkojnë forcat me Ardit Gjebrean në katër netët finale, në Pallatin e Kongreseve, në nëntor.
Eva Murati është një emër i dëgjuar në televizionet shqiptare. Ajo njihet për një karrierë të gjatë në moderim, e cila ka filluar që në moshën 15-vjeçare. Evën e kemi parë në shumë formate të ndryshme televizive, teksa është angazhuar edhe si aktore në disa projekte kinematografike.
Nga ana tjetër Olta Beqiri është një aktore e re. Gjatë karantinës ajo fitoi një popullaritet në rrjetet sociale, duke u shfaqur më pas në serialin “Snob”.
Kujtojmë vitin e shkuar në edicionin e 22-të krah Ardit Gjebreas bashkëprezantoi artistja Marsela Çibukaj.
Për shkak të pandemisë vjet për herë të parë në historinë e festivalit, ai nuk u mbajt në “Pallatin e Koncerteve”.
