Ka përfunduar takimi mes mjekëve dhe ministres së Shëndetësisë dhe Mbrojtjes Sociale në Kryeministri, Ogerta Manastirliu, ku u arrit në përfundimin se kërkesat e tyre do të shqyrtohen në grupe teknike në vijim.
“Janë të 4 pikat që do të diskutohen edhe në tryeza më teknike, pasi janë çështje që adresojnë situata të ndryshme”, tha Manastirliu.
Ministrja e Shëndetësisë u shpreh se qeveria ka vullnetin për të vijuar për të përmbushur kërkesat e mjekëve dhe infermierëve duke shtuar se ata janë në një llogore, për një qëllim të përbashkët.
“Qeveria ka vullnet për të vijuar për të përmbushur kërkesat e mjekëve dhe infermierëve. Ashtu sikurse e kemi treguar mbështetjen për ta në çdo moment të punës tonë. Ne jemi së bashku. Jemi në të njëjtën anë të llogores. Do të vijojmë të punojmë për të mirën qytetarëve dhe padyshim për të adresuar të gjithë nevojat dhe kërkesat e mjekëve”, tha Manastirliu pas takimit me përfaqësues të sindikatës.
Takimi është thirrur nga zyra e bashkëqeverisjes në Kryeministri, aty ku është drejtuar dhe kërkesa e sindikatës së mjekëve.
Gjatë bisedës, u diskutuan në lidhje me 4 kërkesat e mjekëve, ndër të cilat ajo më e rëndësishmja, rritja e pagave për të cilën Kryeministri Rama, pak ditë më parë tha se do të rriten me 40%. Takimet do të vijojnë në grupe teknike në MShMS.
9:00- Kërkuan plotësimin e katër kërkesave, nis takimi i mjekëve në Kryeministri
Ka nisur takimi i mjekëve në Kryeministri. Në këtë takim janë të pranishëm 4 mjekë, ministrja e Shëndetësisë dhe Mbrojtjes Sociale, Ogerta Manastirliu dhe drejtori i QSUT-së, Enkelejd Joti.
Referuar raportimeve të para, mësohet se kryeministri Rama nuk është i pranishëm në këtë takim edhe pse thirrja u bë nga vetë ai, pasditen e së mërkurës.
Kërkesa për takim erdhi pasi mjekët donin që të zhvillojnë një protestë simbolike ditën e sotme në oborrin e QSUT-së.
Pas kërkesës së çuar në polici, kjo e fundit nuk pranoi, me pretendimin se nuk lejohen grumbullimet në kohë pandemie.
Mjekët kërkojnë të protestojnë për plotësimin e 4 kërkesave, të përpiluara më herët nga shoqata e tyre.
Kërkesat
-Të shpallen dëshmorë të kombit të gjithë ata pjesëtarë të personelit shëndetësor të cilët humbin jetën në këtë luftë me këtë armik të padukshëm
-Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën edhe pas fatkeqësive të mundshme në këtë luftë.
-Rritje të vlerësueshme e trajtimit financiar të personelit shëndetësor.
-Personeli shëndetësor të çdo niveli t’i sigurohen të gjitha kushtet optimale në punë për parandalimin e infeksionit sipas të gjitha standardeve kombëtare dhe ndërkombëtare.
