Gjykata Administrative e Tiranës ka vendosur të rrëzojë kërkesën për sigurimin e padisë të paraqitur nga aktorja Anila Bisha. Artistja 57-vjeçare kishte kërkuar që deri në përfundimin e procesit gjyqësor të ndalohej përdorimi i imazhit të saj. Çështja u shqyrtua nga gjyqtari Armand Shkurta, i cili vendosi të mos pranojë masën e sigurimit të padisë, duke lënë në fuqi situatën aktuale deri në një vendim përfundimtar mbi themelin e çështjes.
Në padinë e saj, aktorja pretendon se kontrata me kompaninë “Aleat” kishte efekt deri më 31 dhjetor 2025 dhe parashikonte vetëm përdorimin e imazhit të saj për personazhin e asistentes virtuale “Diella” në platformën e-albania. Sipas saj, kontrata nuk përfshinte përdorimin e imazhit për figurën e “ministres Diella”. Për këtë arsye, Bisha ka kërkuar gjithashtu një dëmshpërblim prej 1 milion eurosh, duke argumentuar se është dëmtuar imazhi dhe reputacioni i saj.
Në një reagim për emisionin ‘Studio Live’, Bisha është shprehur se nëse nuk do ia dalë me gjykatat shqiptare, do e çojë çështjen deri në Strasburg.
“Ky është vendimi i gjykatave shqiptare! Mua më përdorën të drejtat personale për ministre pa asnjë kontratë dhe gjykata këtë nuk e merr fare parasysh. Por unë do të vazhdoj padinë time më tej. Nëse nuk ja dal me gjykatat tona, absolutisht çështjen do e çoj në Strasburg!”
Personazhi i “Ministres Diella” u prezantua publikisht nga kryeministri Edi Rama gjatë Asamblesë së Partisë Socialiste më 11 shtator, si pjesë e kabinetit të ri qeveritar.
