Aktori i famshëm Tom Cruise po xhiron filmin e tij të fundit “Mission Impossible 7”, xhirimet e të cilit janë penguar disa herë për shkak të pandemisë Covid-19.
Së fundmi, stafi i tij ka thyer protokollin e Covid-it, gjë e cila e ka zemëruar keq aktorin.
Cruise nuk ka aspak dëshirë që xhirimet e filmit të vazhdojnë të shtyhen dhe kërkon ta përfundojë sa më parë projektin që ka nisur,
Ndaj, ai ka “kërcënuar” stafin, duke i thënë se nëse kjo gjë përsëritet, ata do të përjashtohen të gjithë nga puna.
“Po krijojmë mijëra vende pune. Nuk dua ta shoh më këtë sjellje! Kurrë! Dhe nëse e përsërisni, jeni të pushuar!”, citohet t’u ketë thënë Cruise pjesëtarëve të stafit sipas “The Sun”.
Mirëpo pas këtij kërcënimi, një pjesë e stafit është larguar me vullnet të plotë nga puna.
Një burim për “The Sun” ka treguar se pesë anëtarë të stafit “Mission Impossible” kanë dhënë dorëheqjen, ndërsa situata ndihet tepër e tensionuar.
“Që kur u bë publik lajmi se Tom Cruise i ka bërtitur stafit, shumë prej tyre janë larguar. Tom është i nxehur për faktin se stafi nuk po e merr seriozisht punën”, shprehet burimi.
“Mission Impossible 7” po xhirohet këto ditë në Londër, ndërsa më herët ishin në Venecia.
Në Itali, në muajin shkurt, xhirimet u ndalën për shkak të përhapjes së koronavirusit atje. Puna rifilloi në shtator me trupën që është spostuar nga Italia, në Norvegji, e tashmë në Britani. Në tetor, xhirimet u ndalën sërish pasi 12 pjesëtarë të stafit dolën pozitiv në testin e koronavirusit.
