Pas një shtatori i cili na dha mundësi për shumë ditë plazh, tetori do të përfaqësojë vjeshtën e vërtetë. Meteorologët parashikojnë se ditët e para të muajit tetor do të dominohen nga shira të izoluar.
Kështu, sipas Meteoalb, duke filluar nga veriu dhe një pjesë e qendrës, gjatë kësaj të shtune do të ketë kthjellime e vranësira kalimtare, më të shpeshta në jug dhe zonat malore, duke u rrezikuar nga shira të izoluar. Pasditja vijon me kthjellime në zonat veriore, por vranësira kalimtare mbeten prezent në qendër dhe jug deri në mbrëmje dhe gjatë natës. Temperaturat e ajrit do të ulen me 1 – 2°C në të dy vlerat ekstreme ditore.
Ndërsa në ditën e diel, Ultësira Perëndimore vijon me kthjellime e vranësira të lehta, ndërsa me vranësira të shpeshta në zonat malore të vendit. Edhe pasditja mbetet me kthjellime e vranësira të lehta thuajse në gjithë vendin, duke përjashtuar zonat lindore ku vranësirat fuqizohen duke rrezikuar juglindjen nga shira të përkohshëm. Temperaturat e ajrit nuk sjellin ndryshime gjatë mëngjesit, por një rritje të lehtë sjell mesdita kur maksimumi do të ngjitet në 26°C.
