Studentët e Universiteteve Publike që po protestojnë edhe sot kundër vendosjes së tarifave për provimet e mbartura, i kanë lënë një afat Ministrisë së Arsimit deri në orën 16:00 për të përmbushur kërkesat e tyre.
Katër kushtet e studentëve drejtuar MASR:
- Shfuqizimi i VKM nr 288 pika numër 4 e cila citon: Studenti, i cilësuar në bazë të rregullores së institucionit të arsimit të lartë publik si përsëritës në një lëndë apo në shumë lëndë dhe vijon studimet në vitin pasardhës, i nënshtrohet tarifës së shkollimit për kredit për detyrimet apo lëndët përsëritëse, si dhe tarifës vjetore të shkollimit të vitit akademik në të cilin vazhdon studimet.
-
- Mbështetur në nenin 99 mbi Këshillat studentorë, Ligji i Arsimit të lartë pika 2 kërkojmë që Bordi i Administrimit të IAL-ve të ketë numër të barabartë votash si nga Ministria e Arsimit dhe Sportit dhe IAL-te, dhe të shtohet një përfaqësues në këtë bord nga studentët.
- Përmirësimi i kushteve të konvikteve.
- Përgjysmimi i tarifës së studimit mbështetur në nenin 99 pika 5 (Ligji i arsimit të Lartë).
Ndërkohë sot, të gjithë fakultetet e Universitetit të Tiranës janë bashkuar tek Politekniku dhe kanë nisur marshimin në Bulevardin ‘Dëshmorët e Kombit’ për të mbërritur në orën 10:00 para godinës së Ministrisë së Arsimit.
Studentët e Universitetit Bujqësor në Institut kanë dalë sot në protestë ashtu si pjesa më madhe e studentëve të Universiteteve Publike në vend. Ata kanë marshuar nga Universiteti Bujqësor drejt autostradës Tiranë-Durrës, duke bllokuar qarkullimin e mjeteve.
Përveç Tiranës, protestohet edhe në Universitetet e Durrësit, Elbasanit dhe Korçës.
Me thirrjet “ne nuk jemi bankomat” dhe “e duam arsimin si gjithë Evropa”, studentët kërkojnë përgjysmim të tarifave dhe heqjen e tarifave shtesë. Ata thonë se do ta vijojnë protestën e tyre dhe nuk do të dorëzohen deri sa të plotësohen kërkesat e tyre.
