Të gjithë u fokusuan te fustani i Ledina Çelos në natën e parë të Festivalit të Këngës në RTSH, por syrit të paparacëve nuk i shpëtoi një tjetër këngëtare. Pas natës finale të festivalit, në media e portale qarkulluan disa foto të këngëtares Xhesika Polo, e cila kishte veshur një fustan prej tyli e dantelle që binte në sy për transparencën në pjesën e bustit.
Shpërndarja e këtyre fotove nuk u prit mirë nga Xhesika, e cila reagoi me një status në profilin e saj në Facebook, ku kërkoi ndjesë dhe tha se nuk do të donte kurrsesi ta ndërtonte famën përmes skandaleve.
“Si fillim dua të falënderoj të gjithë njerëzit që më përkrahën e më ndoqën në festival. Shpresoj që performanca ime të ketë qenë në nivelin e duhur. Kam 5 vite karrierë dhe nuk jam përfolur asnjëherë më shumë se këto dy ditë, as në X Factor, as për 4 ҫmimet në Këngën Magjike e as për klipet e mia. Me sa duket, vetëm “skandalet” të dhënka famë. Fotot që po qarkullojnë nëpër portale nuk janë të qëllimta, kurrë nuk kam dashur të jem në qendër të vëmendjes për arsye që nuk kanë të bëjnë me muzikën time, por njerëz jemi dhe na ndodhin dhe aksidente. Jo gjithmonë jemi në gatishmëri të kamerave dhe të mbrojtur ndaj paparacëve. Fustani im i famshëm që u bë legjendë kishte një përmbajtje shumë të bukur që u njollos nga disa portale që fundja punën e tyre bëjnë. Dua t’ju them të gjithëve që, nëse do të doja ta ndërtoja karrierën time në bazë të vulgaritetit e skandaleve, do e kisha bërë me kohë. Gjithsesi, ҫudia më e madhe 3 ditë zgjat. Unë Xhesika, ju kërkoj shumë ndjesë, pasi pozicioni i fotove nuk dha mesazhin e duhur te ju, po unë ngelem po e njëjta, nuk jam perfekte e nuk më hyn në punë kjo lloj vëmendjeje e fame. Faleminderit për çmimin e medias. Paqe!”
*Shfleto galerinë
