Këngëtarja e njohur e muzikës shqiptare, Silva Gunbardhi, ishte dje e ftuar në emisionin “Top Show” nga ku foli ndër të tjera edhe për raportin me vjehrrën dhe me mamin e saj.
Silva mund të futet në kategorinë e nuseve që shkojnë mirë me vjehrrat, mbase kjo ka lidhje edhe me mënyrën e jetesës që bën ajo. Kur vjehrra zgjohet në 6 të mëngjesit, Silva sapo kthehet në shtëpi dhe shkon fle gjumë dhe zgjohet pasdite. Sapo zgjohet Silva vjehrra kujdeset që t’i përgatiti kafen e mëngjesit.
“Mua ma bën kafen vjehrra, ata nuk janë familje me rregulla. Më shpesh ndodh që kur ngrihet ajo, unë fle. Ata më kanë njohur mua si shoqja e Dafit në fillim. Sa herë Dafi i thoshte ‘o ma, jam me Silvën’, ajo thoshte ‘ah, shyqyr’”, rrëfeu Silva duke treguar marrëdhënien harmonike që ka me familjarët e bashkëshortit.
Ndërsa mami i Silvës është krejt ndryshe në karakter nga vjehrra. Këngëtarja tha me humor se mami i saj njihet si “sherifja” e lagjes.
“Mami ka qenë 8 vjet administratorja e pallatit, por tani që ka dalë në pension, është administratore e Dalvit. Të gjithë në lagje i thërrisnin ‘sherife’, sepse nuk i lejonte djemtë të pinin hashash poshtë pallatit. Po ashtu, as çiftet nuk i linte të putheshin (gjeni një vend tjetër, këtu ka banorë)…” tregoi Silva për të ëmën.
Duke qeshur, ajo kujton edhe një prej thirrjeve më të shpeshta të së ëmës kur ishte administratore e pallatit: “Dyshi, mos e përplas derën…”
Ky rrëfim i Silvës për mamin shkaktoi shumë të qeshura në publik, ndërsa ne shpresojmë që këngëtarja të mos e ketë punën “pisk” kur të kthehet në shtëpi pas këtyre deklaratave që bëri.
