“Ajo është e paparashikueshme me muzikën e saj, sidomos me fuqinë e zërit”. Ky përshkrim për këngëtaren me origjinë nga Kosova, Dua Lipa, vjen në kopertinën e revistës prestigjoze amerikane “Elle”, për muajin janar.
E veshur me një kartigan blu dhe poshtë tij me një bluzë të bardhë, Dua tregon shumë pak nga trupi i saj, veç bukurisë së fytyrës. Ajo kërkon në këtë mënyrë të përcjellë thjeshtësinë, duke i bërë njerëzit të “dashurohen” pas çiltërsisë së saj dhe talentit që ka në muzikë.
Lajmi për këtë hap të rëndësishëm në karrierën e saj u bë e ditur nga vetë artistja me origjinë shqiptare në rrjetet e saj sociale, e cila ka postuar një foto të shkëputur nga ky numër i revistës, ndërsa nuk e ka fshehur entuziasmin, duke shkruar: “Erdhi dhe dita ime. Ky është numri i “Elle” për muajin janar dhe kjo jam unë!!”
Në shkrimin e Bobby Olivier thuhet se “Dua Lipa kishte shkuar në Kosovë në moshën 8-vjeçare, për t’u rikthyer në Londër në moshën 15-vjeçare”. Ndërsa në titull lexohet: “Tingujt e veçantë të Dua Lipës janë gati për të pushtuar pistën e vallëzimit”.
Ndërsa Dua Lipa në këtë intervistë thotë se gjatë perfomancave të saj dëshiron të shoh të tjerët duke kënduar këngët e saj dhe të vallëzojnë me to. “Unë vetëm dua të performoj ndërsa të tjerët këndojnë dhe vallëzojnë më këngët e mia”, thotë ajo.
Pak ditë më parë, 20-vjeçarja Lipa njoftoi turneun e saj të parë në Britani, që do të nisë në janar të 2016-s. Ndërsa kënga e saj më e fundit, “Be The One” është kthyer në hit.
Në fund të muajit nëntor, Dua Lipa u rendit nga BBC si një prej artisteve të reja që pritet të shkëlqejë në vitin 2016, duke e bërë pjesë të listës së përvitshme “Sound Of 2016”.
