“S’do të këndoj më që nga 31 dhjetori i 2018, shpresoj të bëj një koncert të madh dhe pastaj do të merrem me verën”. Kjo është deklarata e artistit të mirënjohur italian Al Bano Carrisi në emisionin ‘Porta a Porta’, i cili vitin e ardhshëm do të mbushë 75 vjeç.
53 vjet karrierë dhe një vit që filloi me emocione të forta, pas skualifikimit nga finalja e Sanremo-s.
Si shkon biznesi juaj i verës, është pyetur ai pas zhgënjimit në Sanremo dhe me ironi është përgjigjur: “Shes më shumë shishe vere se sa disqe, 1 milion e 400 mijë shishe në vit”.
Por në fund të marsit këngëtari pati probleme të rënda me shëndetin, pasi u godit nga një ishemi, ku u detyrua të shtrohet në spital në Lece, pas një infarkti që kishte kaluar në dhjetor.
Por fatmirësisht e kaloi shpejt dhe tani shëndeti i tij është shumë mirë, njësoj si humori. Ai vazhdoi me koncerte dhe në verë u ngjit në skenë me ish-bashkëshorten Romina Power, me të cilën ishte ritakuar dy vite më parë, në një koncert të madh në Verona, pas 21 vitesh marrëdhënie të ngrirë.
Një nga verërat e Carrisi-t në Puglia quhet ‘Felicita’, njësoj si emri i këngës që i dha artistit një sukses global.
