Ditën e sotme në emisionin “Shqipëria Live” është intervistuar artisja ukrainase, Jamala, e cila fitoi “Eurovision”-in e vitit 2016, me këngën 1944 (Ukraine).
Tematika e këngës kishte të bënte me Luftën e Dytë Botërore, duke treguar se çfarë kanë kaluar pasardhësit e tyre në këtë kohë kaq të zymtë. Por sot ata janë duke e jetuar sërish këtë pjesë të historisë.
Këngëtarja ndodhet aktualisht në Turqi vetëm me fëmijët e saj, pasi bashkëshorti i qëndroi në Ukrainë për të mbrojtur atdheun e tyre.
Artistja floli për momentin kur fitoi “Eurvision”-in dhe nëse e priste që të ndodhte lufta në Ukrainë.
“Kur shkruajta 1944, ishte për gjyshen time. Ishte për familjen time. Unë mendova se po shkruaja për të shkuarën, por e sotmja ngjan kaq e vërtetë. Të huajt vijnë në shtëpinë tuaj dhe ju vrasin të gjithëve dhe ju thonë që nuk jemi fajtorë” , tha këngëtarja.
Kur u pyet në studio se si ndihet për gjendjen në të cilën është përfshirë vendi i saj, Jamala u shpreh se nuk ka fjalë për ta përshkruar.
“Nuk kam fjalë për ta përshkruar atë që po ndodh. Është e tmerrshme. Kjo nuk është një luftë vetëm ndaj Ukrainës, por edhe vlerave Evropiane. Çdo ditë do të doja që kjo luftë të mbaronte dhe të përqafoja bashkëshortin tim në këto momente të vështira dhe të mendoja që e nesërmja të përfundonte. Por kur shikoj se ku ka shkuar situata e përjetoj më keq.”
Jamala tha gjithashtu se po përpiqet të përdorë zërin e saj për të bërë koncerte dhe për të mbledhur shuma parash për Ukrainën.
