Studentët e Fakultetit Ekonomik në Tiranë kanë protestuar ditën e sotme për tarifat e shkollës. Ata kanë kërkuar që për nivelin “Master” të përgjysmohen tarifat, ndërsa për “Bachelorin” të ketë lehtësira dhe rishikim të tarifave për vitet në vijim.
Studentët kanë përpiluar kërkesat dhe i kanë depozituar ato pranë Bordit të Administrimit në Universitetin e Tiranës dhe në Ministrinë e Arsimit.
Bordi reagoi pas kërkesve të studentëve duke njoftuar një mbledhje urgjente, ndërsa Ministria e Arsimit si gjithmonë heshti, pavarësisht se duhet të jetë e para për të dhënë një zgjidhje.
Për thuajse një vit të tërë të gjithë studentët morën leksione nga shtëpia për shkak të pandemisë së Covid-19 dhe ndaj ata kërkojnë prej kohësh përgjysmimin e tarifave që në disa fakultete janë mjaft të larta.
“Kemi vështirësi financare për të paguar tarifën. Kërkojmë që Dekanati të jetë palë me studentët. Këtë vit të përgjysmohet dhe pastaj për vitet e tjera të rishikohet. Fakulteti Ekonomik e ka tarifën më të lartë. MAS i kërkojmë përgjysmim tarife për nivelin e dytë Master. Bordit të Administrimit i kërkojmë masa lehtësuese siç janë shtyrja, pagesa më këste apo rishikimi i tarifave për vitet në vijim. MAS ka vendimarrje direkte dhe në shtyrjen e afateve dhe përgjysmimin e tarifës. Nga MAS nuk ka asnjë reagim. Presim përgjigje”, u shprehën studentët.
Ata caktuan si afat të fundit 30 shtatorin për marrjen e një përgjigjeje për këtë problem të tyre.
