Ndryshe nga se parashikojnë protokollet e sigurisë anti-Covid, udhëtimi me tranport publik në kohë pandemie mbetet një problem i madh.
Qytetarët denoncojnë çdo ditë mosrespektimin e rregullave dhe tejmbushjen e autobusave, duke rrezikuar kështu çdo ditë jetën. E kjo është e pashmangshme për shkak të detyrimeve të përditshme, siç janë shkolla apo puna.
Mbrëmjen e sotme, kreu i Shoqatës së transportit Publik Dashnor Memaj e drejtoi të gjithë përgjegjësinë tek pasagjerët. I ftuar në “Radari Informativ” Memaj tha se mbështetur në një studim, 0.2% e infektimeve me Covid-19 e kanë burimin në linjat e transportit urban.
“Kemi vështirësi ekonomike. Protokollet nga pjesa më e madhe po respektohen. Është e këshillueshme të ruhet një farë distance. Sipas studimeve ndërkombëtarë, vetëm 0.2% vijnë nga transporti urban. Transporti urban është shumë i sigurtë. Nuk dua të mbroj sektorin e transportit publik por nga studimet ndërkombëtare nuk është një vatër infeksioni sepse vetëm 0.2% është risku i infeksionit. Pasagjerët janë të detyruar të mbajnë maskë, distancë. Eleminohet edhe komunikimi për shkak se udhëtarët nuk njihen me njëri tjetrin”, u shpreh ai.
Memaj deklaroi se nuk është detyra e punonjësit të Transportit Urban të ruajë distancën apo t’u heqë vërejtje qytetarëve pa maskë, ndërsa vuri theksin se ora e re policore ka shtuar edhe më tej fluksin në disa fasha orare të caktuara.
Për Memajn në urbane janë plotësuar të gjitha masat e nevojshme, nga udhëzuesit e afishuar e deri te dezinfektantët për pasagjerët.
