Një tjetër rast tronditës i tentativës për vetëvrasje është shënuar në vend, këtë herë në Gramsh.
Një e mitur, vetëm 17 vjeç ka tentuar t’i jap fund jetës duke konsumuar fotoksinë.
Burime nga policia bëjnë me dije se e reja është paraqitur mbrëmjen e djeshme në spitalin rajonal, ku ka marrë mjekime dhe tashmë ndodhet jashtë rrezikut për jetën.
Rasti është konfirmuar sot nga policia përmes një njoftimi zyrtar. Paraprakisht, nuk dihen ende arsyet që e shtynë 17-vjeçaren të merrte këtë hap ekstrem që dyshohet se ka ardhur si pasojë e gjendjes së rënduar psikologjike.
Pritet që e vërteta të mësohet pasi e reja të merret në pyetje nga uniformat blu dhe psikologët. Ky rast i përsëritur ditët e fundit në vend duhet të shërbejë si një këmbanë alarmi për institucionet përgjegjëse të cilat duhet të ndërmarrin “politika” dhe projekte sensibilizuese për të shmangur çdo tragjedi.
Ky muaj ka shënuar një numër në rritje të rasteve të vetëvrasjes dhe tentativës së vetëvrasjes nga të rinj e qytetarë të moshës së mesme.
Një prej tyre është edhe ai i efektives Aldorjana Loshi e cila në kushtet e gjendjes së rënduar psikologjike i dha fund jetës. Po ashtu, vetëm 3 ditë më parë një 17-vjeçare u gjet e pajetë nga familjarët në banesën e saj në Roskovec. Sakaq, 3 raste të tjera të tentativës së vetëvrasjes janë identifikuar përgjatë këtyre ditëve edhe në Elbasan.
