Mbledhja e disa prej emrave më të njohur të ekranit shqiptar pasditen e së martës nuk lidhej as me artin apo me modën. Të gjithë u bashkuan për të “duartrokitur” arritjet e nismës “Fundjavë ndryshe” përgjatë një viti dhe për të mbështetur më tej këtë iniciativë.
Gjatë një viti disa nga emrat më të njohur të muzikës apo të televizionit shqiptar i pamë në formën e tyre të përditshme dhe të thjeshtë, ndërsa ndihmonin shtëpi më shtëpi njerëzit në nevojë dhe të lënë në harresë.
Ndër personazhet e famshëm që u dalluan të ndiqnin nga afër eventin ishte, Alban Skënderaj, Soni Malaj me partnerin, Ermal Mamaqi, Orinda Huta me të fejuarin Turjan Hyska, dy aktorët e njohur, Florjan Binaj dhe Irgen Çela, fotografi Sonny K. Elson, Albana Osmani, disa nga krerët e besimeve fetare, por dhe personazhe të njohur në skenën politike, si Arben Malaj.
Gjatë eventit u ndan çmime për personat dhe emisionet që ndihmuan në përhapjen e iniciativës. Nën drejtimin e Arbër Hajdarit ky fondacion festoi 1-vjetorin e krijimit, por me një vizion të ri për të ndihmuar të pamundurit.
“Kemi shumë ide të cilat kanë vetëofruar punë dhe ne jemi ndërmjetësit për të punësuar kryefamiljarët e njerëzve në nevojë. Në fillimet e saj ne mendonim se bamirësia nuk është zgjidhje, por e kishim gabim. Tani mendojmë se po, bamirësia mund të jetë një nga zgjedhjet e varfërisë”, u shpreh Arbër Hajdari.
*Shfleto galerinë
Burimi: Iconstyle
Fotografitë: Elus Skëndaj/ Iconstyle
