Si mund të hakmerresh ndaj të tjerëve? Kate Winslet është ai personazh që lë mënjanë inatin, ndërsa na jep të gjithëve një mësim.
“Të kesh një jetesë të mirë dhe të jesh i lumtur është hakmarrja më e mirë për të gjithë ata që duan të të shohin keq”, thotë aktorja.
40-vjeçarja ishte e ftuar në “The Today Show” për të folur për filmin e saj më të ri “The Dressmaker”, ku ajo mban rolin kryesor. Personazhi i saj ka për qëllim të marrë hak për gjithë të këqijat që i janë bërë.
Kate tregon se e gjen veten shumë mirë në këtë rol, pasi ajo kur ka qenë adoleshente, në fillimet e karrierës së saj, ngacmohej nga miqtë e shkollës për faktin se ishte mbipeshë.
Ajo shton se shokët e saj ndjeheshin xhelozë për të, sepse ajo që atëherë merrte pjesë në role të vogla teatrale. Kate është e mendimit që, “nëse dikush të urren për suksesin dhe punën tënde të palodhur, atëherë ti duhet t’ia bësh atyre të ditur sesa mirë shkojnë gjërat në jetën tënde dhe sesa i lumtur je. Kjo është hakmarrja më e mirë, si qershia mbi tortë”.
Burimi: Daily Mail
