Të paktën 23 persona kanë humbur jetën dhe disa të tjerë janë plagosur pas një zjarri që shpërtheu në dyqanin Waldo’s në Hermosillo, Meksikë, më 1 nëntor. Ngjarja ndodhi rreth orës 15:09, ndërsa dyqani ishte i mbushur me blerës që përgatiteshin për festimet e Ditës së të Vdekurve, raportuan mediat lokale La Jornada, Excelsior dhe El Sol de Mexico. Mes viktimave ka edhe fëmijë, ndërsa 12 të tjerë u plagosën.
Prokurori i përgjithshëm i Sonoras, Gustavo Salas Chávez, tha se hetimi paraprak sugjeron se vdekjet ndodhën për shkak të thithjes së gazrave toksikë. “Në këtë moment nuk kemi ndonjë indicie që të na çojë të supozojmë se zjarri ishte i qëllimshëm,” tha ai.
Fotot nga vendngjarja tregojnë tym të dendur që del nga dritaret e thyera të dyqanit, ndërsa shërbimet emergjente përballuan flakët për disa orë për ta fikur zjarrin. Autoritetet besojnë se shpërthimi mund të ketë qenë pasojë e një transformatori që modifikonte tensionin elektrik të ndërtesës.
Presidentja e Meksikës, Claudia Sheinbaum, shprehu ngushëllimet e saj për familjet e viktimave dhe bëri të ditur se ka urdhëruar dërgimin e një ekipi ndihme për të asistuar të plagosurit dhe të prekurit.
Dyqanet Waldo’s ndodhen në shumë qytete të Meksikës, dhe kompania e ka shprehur keqardhjen e saj për incidentin dhe humbjen e jetëve në një deklaratë në Facebook.
