Ylli brazilian i futbollit, Neymar, ka pranuar se mund të tërhiqet nga futbolli profesionist në fund të vitit 2026, pas një serie të gjatë problemesh me lëndimet që e kanë shqetësuar gjatë karrierës së tij. Edhe pse dëshiron me ngulm të përfaqësojë Brazilin në Kupën e Botës të verës së ardhshme, Neymar ka theksuar se nuk mund të parashikojë të ardhmen dhe ekziston mundësia që të detyrohet të varë këpucët në gozhdë.
Aktualisht 34 vjeç, Neymar ka kaluar një periudhë të vështirë me lëndime. Në dhjetor të vitit 2025, ai iu nënshtrua një operacioni për problemin e gjatë me gjurin, pas një mungese të gjatë nga fushat për shkak të dëmtimit të ligamentit kryesor. Pas rikthimit te Santos, Neymar ka shijuar përsëri futbollin në Amerikën e Jugut dhe ka rinovuar kontratën deri në fund të vitit.
Rikthimi te kombëtarja e Brazilit mbetet një prioritet i madh për yllin, i cili nuk ka luajtur me ekipin kombëtar që nga tetori 2023. Vendimi për të vazhduar karrierën do të merret pas tentativës së tij për të fituar atë që i ka munguar – titullin e Kupës së Botës.
Në një intervistë për CazeTV, Neymar tha: “Nuk e di çfarë më rezervon e ardhmja. Është e mundur që në dhjetor të dua të lë futbollin. Ky vit është shumë i rëndësishëm, jo vetëm për Santos, por edhe për kombëtaren braziliane dhe për mua.”
Ai shtoi se përpjekjet për të rikuperuar formën më të mirë janë të pandalshme: “Doja të kthehesha 100% këtë sezon, ndaj pushova disa ndeshje. E di që shumë njerëz nuk e kuptojnë realitetin e ditës për ditë, por duhet ta përballoj këtë për t’u kthyer në formë të plotë, pa dhimbje dhe pa frikë.”
Neymar vazhdon të punojë intensivisht për rikuperimin e plotë dhe për të dhënë maksimumin, teksa ky sezon mund të vendosë të ardhmen e karrierës së tij.
