Kaosi i krijuar në Kakavijë ku qindra qytetarë po presin në radhë kilometrike për të kaluar kufirin, duket se nuk i ka bërë fare përshtypje ministrit të Punëve të Jashtme, Gent Cakaj.
Ky i fundit ka fikur telefonin në një tentativë të Report Tv për të komunikuar për gjendjen e rëndë në pikën e kalimit kufitar, ku qytetarët po presin prej 2-3 ditësh për të kaluar. Veprimi nuk tregon gjë tjetër veçse një papërgjegjshmëri të ministrit të detyrë, për t’i gjetur zgjidhje kësaj situate të vështirë, që është shoqëruar edhe me incidente ku është dashur ambulanca.
I vetmi njoftim që ka bërë ministria është ai për të kujtuar të gjithë qytetarët se mund ta kryejnë testin edhe në institucionet e licencuara shqiptare të cilat e ofrojnë me një çmim prej 95 eurosh dhe ta përkthejnë përgjigjen në anglisht.
“Pala greke ka njoftuar se do të marrë masa të tjera për lehtësimin e situatës deri në heqjen e detyrimit për bërjen e testit. Risjellim në vëmendje se shtetasit shqiptarë mund ta kryejnë testin edhe në institucionet e licencuara shqiptare dhe ta përkthejnë përgjigjen në anglisht. Ky testim njihet edhe nga autoritetet greke dhe do ta lehtësonte më shumë situatën”, njofton ministria.
Por a mund të zgjedhësh të paguash për testin në laboratoret private, kur Greqia e bën falas?
Qytetarët janë dyndur të kalojnë kufirin pasi në datën 16 gusht në Greqi hyn në fuqi vendimi se çdo person që hyn në vend duhet të karantinohet 7 ditë. Ata duan gjithashtu të përfitojnë nga mundësia që Greqia ofron për testimin falas për COVID-19.
Tamponët bëhen në kufi pa kurrëfarë pagese dhe kjo tregon qartë se përpjekjet e vendit tonë në këtë drejtim lënë për të dëshiruar. Si mund t’i drejtosh qytetarët të bëjnë një test që kushton 95 euro, në një kohë që ligji e thotë që duhet të jetë falas!
Qeveria shqiptare zgjodhi pak kohë më parë, që edhe shërbimin e testimeve serologjike ta kalonte në strukturat private dhe tani një shqiptari do t’i duhen rreth 40 mijë lekë të vjetër për ta realizuar testin. Rënia dakord për vendosjen e këtij çmimi në shumë laboratore shqiptare, ka krijuar një lloj oligopoli në mënyrë që të mos ketë konkurrencë (lexo këtu).
Këto marrëveshje njihen si të ashtuquajturat “Kartele”, që i bëjnë bashkë dy ose më shumë biznese me qëllim që të shmangin konkurrencën e lirë në treg. Kjo bën që laboratorët të mos konkurrojnë me njëri-tjetrin në uljen e çmimeve.
Në një kohë që ligji shqiptar e ofron falas këtë shërbim (lexo këtu), “Iconstyle.al” i ka kërkuar zyrtarisht Autoritetit të Konkurrencës të shohë mënyrën sesi është ndërtuar dhe funksionon kryerja e analizave serologjike, në zbatim të përgjegjësive ligjore që Autoriteti ka.
