Pas kaosit në Durrës, qyteti i pushtuar nga mbeturinat që nuk kishin se ku të depozitoheshin, një tjetër emergjencë mjedisore na vjen nga Kurbini, ndërkohë që Ministria e Turizmit dhe Mjedisit fle!
Në një kohë që jemi në mes të sezonit turistik, rruga që të çon buzë detit nga Laçi në fshatin Adriatik është e mbushur plot me mbeturina.
Banorë të fshatrave në Kurbin ankohen se nuk ka vend për hedhjen e tyre, pasi mungojnë kontejnerët.
Pirgje të mëdha mbeturinash dhe inertesh shfaqen në të dy anët e rrugës me gjatësi 11 km që lidh fshatin Adriatik me rrugën nacionale.
Vetë bashkia nuk ka marrë asnjë masë për të zgjidhur këtë problematikë që vijon prej vitesh, ndërsa banorët, në mungesë të kontejnerëve, u vendosin flakën mbeturinave kur pirgjet bëhen të mëdha.
“Mbeturinat këtu janë më keq se në landfill. Këtu s’ka kosha mbeturinash. Kush të mundet vjen e hedh këtu. Lokalet i hedhin këtu, dallohen shishet. Në bashki kam bërë ankesë por askush nuk ka ardhur shprehet një banor”, shprehet një banor i zonës për Report TV.
Këto mbeturina janë depozituar në anë të rrugës duke u bërë kështu një problematikë e madhe në një kohë që pritet të ringrihet sektori i turizmit në vend nga kriza ekonomike e pandemisë.
Panorama në këtë sezon veror është e trishtë por me rritjen e temperaturave situata pritet të bëhet edhe më e vështire dhe e rrezikshme për shëndetin e banorëve të Adriatikut.
