Kanye West ka deklaruar se arsyeja që ndërpreu këngëtaren Taylor Swift në MTV Video Music Awards në 2009, për t’i thënë asaj se nuk e meritonte çmimin, ishte një thirrje nga Zoti.
Reperi 43-vjeçar vrapoi në skenë në ceremoninë e ndarjes së çmimeve muzikore mbi një dekadë më parë, ndërsa Taylor – e cila ishte vetëm 19 vjeç në atë kohë – po pranonte çmimin për videon më të mirë për këngën e saj You Belong With Me, sepse ai besonte se Beyoncé e meritonte trofeun.
Ai në atë kohë tha: “Yo Taylor, unë jam vërtet i lumtur për ty, po të lë të mbarosh, por Beyoncé kishte një nga videot më të mira të të gjitha kohërave! Një nga videot më të mira të të gjitha kohërave!”
Në një intervistë të martën West pretendoi se veprimet e tij – të cilat krijuan hatërmbetje mes tij dhe Taylor – ishin rezultat i një fuqie më të lartë, që i dha informacion.
Ai tha: “Tani për tani, Zoti po më jep informacion … Nëse Zoti nuk do që unë të vrapoj në skenë dhe të them se Beyoncé kishte videon më të mirë, ai nuk do të më kishte ulur në rreshtin e parë. Unë do të isha ulur mbrapa. Nuk do ta kishte bërë kaq qesharake një ide, sepse nuk kisha dëgjuar kurrë më parë për këtë person, dhe Single Ladies është, si një nga videot më të mira të të gjitha kohërave”.
Edhe pse reperi tha se ishte Zoti ai që ndikoi në vendimet e tij në vitin 2009, ai pretendon se nuk filloi të lexonte Biblën deri pas shtrimit në spital në vitin 2016 për kurimin psikiatrik dhe trajtimin e psikozës së përkohshme.
West gjithashtu këmbënguli se ai nuk dëshiron që lidhja e tij me Zotin të duket e çuditshme te fansat e tij.
