Kanye West ka pranuar humbjen në zgjedhjet presidenciale të SHBA-së, pasi mori pak më shumë se 57 mijë vota ditën e djeshme. Megjithatë reperi ka lënë të kuptohet se pas 4 vjetësh do të kandidojë sërish për t’u bërë President i SHBA-ve.
Reperi i njohur ndryshe si Yeezy publikoi në Twitter një foto të tijën, në të cilën shfaqej përpara një harte elektorale shoqëruar me mbishkrimin: “Welp Kanye 2024”.
West votoi për veten e tij në këto zgjedhje, megjithëse kjo votë quhet e pavlefshme. Kanye West publikoi në Twitter ditën e djeshme një video të tij duke plotësuar fletën e votimit në një vend në Park County, ku ai ka dhe një fermë.
” Zoti është aq i mirë. Sot unë jam duke votuar për herë të parë në jetën time, për Presidentin e Shteteve të Bashkuara, për dikë që me të vërtetë i besoj…mua”, u shpreh reperi gjatë votimeve.
Kanye u përfshi në votime në disa shtete, por jo në fushëbetejat kryesore si Florida, Pensilvani apo Michigan. Sipas Associated Press reperi ka marrë më shumë vota në Tennessee, 10.188.
Reperi është shprehur se ai e ka marrë këtë gjë si një shenjë nga Zoti që në vitin 2015-të dhe nuk e kishte besuar më parë se mund të kandidonte ndonjëherë për President të SHBA-ve.
“Ishte diçka që Zoti më vuri në zemër që në vitin 2015. Disa ditë para ndarjes së çmimeve MTV, më erdhi një lloj ndriçimi në dush. Kur e mendova për herë të parë, thjesht fillova të qesh me vete dhe i gjithë ky gëzim erdhi në gjithë trupin tim, përmes shpirtit.”, ka thënë Kanye.
