Ilda Bejleri është një ndër emrat më të lakuar në showbiz-in shqiptar, e cila njihet më së shumti për profesionalitetin e saj në gazetarinë sportive.
Për shkak të përvojës së saj disavjeçare në këtë fushë, u përfol më herët se moderatorja do të kandidonte për kreun e Federatës Shqiptare të Futbollit. Po ashtu në këtë listë thuhej se do të ishin dhe tre emra të tjerë, Dritan Shakohoxha, Sulejman Starova dhe ish-deputeti Selami Jenisheri.
Së fundmi, Ilda ka qenë e ftuar në emisionin “Ftesë në 5” ku dhe ka zbuluar të vërtetën që fshihet pas gjithë këtyre zërave.
Ajo tha se kishte marrë shumë mesazhe urimi, megjithatë, nuk ka asgjë të vërtetë.
“Edhe njerëz të afërt më shkruanin. Por nuk është e vërtetë, sepse në momentin që do të doja të kandidoja, do ta thoja vetë”, është shprehur ajo.
Po ashtu, moderatorja tha se kandidaturat e tjera për asnjë moment nuk janë zyrtarizuar.
Kujtojmë se këtë sezon, Bejleri nuk ka zgjedhur fushën e sportit pasi është bërë pjesë e “ABC News” ku dhe do të moderojë një spektakël baleti.
“Pasi ‘riktheva dallëndyshet’ me një sukses spektakolar i rikthehem baletit në një tjetër spektakël të jashtëzakonshëm”, ka shkruar Ilda në Instagram-in e saj.
“Dance Reality Show” titullohet “T’ka mami yll”, ku protagonistë do të jenë fëmijët e moshës 10- 15 vjeç. Por edhe mamatë e tyre, të cilat do të synojnë, me çdo kusht, që në sfidat e kërcimit fitues të jetë fëmija i tyre.
