Dy ditë pas ekzekutimit tronditës të çiftit Boran Bërçana dhe Silvana Ndoci në Shkodër, kamerat e sigurisë në vendngjarje kanë mundur të hedhin më shumë dritë mbi krimin e rëndë. Sipas policisë, çifti ka qenë në plazh ditën e diel dhe më pas janë argëtuar në lokalet e natës deri pas mesnate. Rreth orës 01:15, ata janë kthyer në pallatin ku banonin me qira prej 8-muajsh, ku priteshin nga ekzekutuesi i tyre.
Nga kamerat e sigurisë të sekuestruara, policia ka zbuluar se autori ka vepruar i vetëm dhe dyshohet se mund të ketë qenë një vrasës me pagesë. Ai mbante vetëm një kapele më të cilën kishte mbuluar një pjesë të fytyrës, ç’ka e ka vështirësuar edhe më tepër identifikimin e tij. Sapo Boran Bërçana ka parkuar makinën poshtë pallatit, ekzekutuesi i është afruar makinës dhe duke përfituar nga xhamat e hapur, ka futur dorën brenda në makinë dhe ka qëlluar me 23 plumba mbi çiftin, duke mos i lënë asnjë mundësi shpëtimi. Sakaq mësohet se djali 2-vjeçar i dyshes ka qenë duke fjetur në sediljen e pasme. Pas vrasjes së dyfishtë, autori është larguar me një makinë tip Mercedes-Benz, që më pas u gjet e djegur. Policia ka bërë me dije se makina e arratisjes ka qenë e vjedhur në Tiranë, ndërsa disa pjesë të sajat ishin marrë në vende të ndryshme dhe i ishin montuar.
Një nga detajet më tronditëse të krimit është fakti që djali i mitur i çiftit Bërçana-Ndoci ka qëndruar për plot 5 orë në makinë me prindërit e vrarë në makinë, pasi ambulanca dhe policia ka mbërritur në vendngjarje vetëm në orën 6:40, kur krimi u zbulua pikërisht për shkak të të qarave të fëmijës, që ishte futur në krahët e së ëmës së ndjerë.
Sipas policisë, shkak që të shtënat nuk kanë alarmuar banorët e zonës mund të ketë qenë përdorimi i një silenciatori. Megjithatë, ekspertët shpjegojnë se gjithsesi arma tip “MP5” me të cilën është kryer krimi, nuk ka zhurmë shumë të fortë. Policia po vijon hetimet për zbardhjen e shkaqeve të ngjarjes dhe për zbulimin e autorit të ngjarjes së rëndë. 30-vjeçari Boran Bërçana prej muajit prill kishte dhënë dorëheqjen e tij nga posti i efektivit të policisë, duke mos iu nënshtruar procesit të Vetingut. Pas dorëheqjes ai ishte larguar për 2 muaj në Spanjë dhe policia dyshon se një konflikt i mundshëm gjatë këtij udhëtimi mund të jetë bërë shkak për ngjarjen. Gjithsesi kjo pistë hetimi është ende e dyshimtë duke qenë se policia nuk ka asnjë të dhënë për veprimtari kriminale të Bërçanës në këtë shtet.
Burimi: Panorama
